【星島獨家】重量級男歌手客串《K風暴》 姜濤柳應廷玩手指鬥力鬼殺咁嘈

姜濤和影后毛舜筠（毛姐）正忙於拍攝由彭秀慧執導的英皇電影《K風暴》（暫名），開拍前經過多次試鏡，MIRROR成員柳應廷（Jer）成功獲得角色！電影原本設定姜濤和毛舜筠飾演母子，不過劇本經修改後，改由Jer 做毛姐的兒子，姜濤就繼續做「萬人迷」！日前毛舜筠、姜濤及Jer現身金鐘拍外景，同樣首次拍電影的姜濤和Jer互相照應，休息時仲玩手指鬥力遊戲解悶，兩位「小朋友」超搞笑！

當日劇組安排了不少臨時演員飾演姜濤粉絲，一Roll機，臨時演員即上晒身變身「姜糖」追住姜濤上保姆車，毛姐和Jer 則在旁護航，最後毛姐做埋司機飛車走人！拍攝前輩毛姐時 ，姜濤和Jer都特別緊張，每拍完一個鏡頭 都會睇Playback ！另外，一到休息時間，姜濤和Jer兩兄弟都會情不自禁互相調戲，前者更撩後者玩手指鬥力遊戲解悶，姜濤貫徹玩得就要贏的態度，出力玩到Jer嗌晒救命，兩人十足大細路自得其樂都幾好笑！

電影以花姐的經理人工作為主軸，而毛姐就是飾演經理人一角，因為將時間投放在旗下藝人身上而忽略與兒子的相處，導致母子關係出現問題，之前盛傳姜濤飾演毛舜筠的兒子，不過為求完美，彭秀慧最後修改劇本。知情者透露：「最後劇本改咗Jer同毛舜筠做母子，都幾有發揮，會成日因為不滿媽咪冷落自己而嘈交，姜濤就做明星，同現實嘅自己一樣由冇人識到做咗萬人迷，佢哋三個有好多對手戲！今次除咗有好多新進演員演出，仲會有一個重量級男歌手客串添！ 」