Juicy叮｜27歲未讀完大學無做過全職工 網民慨嘆人生是否「已完」

有網民慨嘆，因身患重病以及學業波折，縱使年届27歲都未曾任職過全職工作，問其他網民其人生是否「已完」

網民透露，中學時成績不錯一直是全級頭三名內，文憑試成績算中上，發文者雖然好學但個性悲觀，爸爸又有情緒問題，覺得人生無咩希望。之後發文者因為聽媽媽意見北上廣州讀大學商科學位，結果完全不感興趣，期間發文者不幸生腫瘤，退學返港求醫。

發文者因治病前後花費兩年多，休養好後決定再讀書。發文者在香港重新修讀化學，結果兩年後又突然轉校讀城市研究。又讀了兩年發現做不到理想工作，加上反修例示威運動影響最後退學，轉去讀電腦重頭開始。

發文者稱，間中有做兼職，例如幫人補習、接下小型電腦工作等。「其實我都知自己過去衰在貪心咩都想要讀，思想唔夠堅定，同埋唔好彩患咗病，搞到浪費咗好多青春，明白依個社會亦最唔like我依種人。」

發文者又問，「其實係咪人生已完？做算讀得幾好，以後唔會再有老闆請，唔會再有希望？當年病後連生育能力都無埋，我已唔打算結婚，已疊埋心水一世做單身狗，只係想喺職場上保留一定競爭力，做個有價值嘅人。」

有網民建議，「你而家讀電腦讀到完成學業，唔好又轉其他嘢或停學，讀完有個degree，點都搵到份電腦做，而家多人移民，啲人又生得少，香港需要人材，你亦可上大陸發展，機遇處處，點會人生已完，堅持理想向前行便會有路行。」、「你今次一定要同自己講一定要畢業，唔好半途又再轉。放棄好易，要向目標前進唔放棄先可以行出屬於一條自己既路。 你識得反省即是代表你根本唔想自己就咁就一世，所以你更加應該要為自己加油，唔好咁易放棄。 你而家先27，仲有好長嘅路，機會永遠都是留俾有準備既人。 準備好自己，當機會來到你先有能力去爭取。若輕言放棄唔準備好自己，機會來到你手都只會流走。」

有網民安慰道，「你識得檢討自己嘅問題，比好多人都好，唔好浪費時間自怨自艾，努力過好每一日」、「27歲仲好後生，最緊要知道自己想要咩。set好目標，努力向目標邁進，唔好三心兩意半途而廢」、「其實有好多做研究嘅讀完博士年紀都唔細先出嚟做嘢。不過既然你屋企唔等你開飯，今次當然要讀埋個本科學位先喇。年青時都已經任性咗，而家就努力啲讀拎個好成績方便第日再進修。年紀唔係問題，但你預人哋只會畀fresh grad價錢去請你」

帖文轉載自《廿七歲仍然無做過全職工作，人生是否已完？》