獨家丨黃翊好冷靜搵嘢食緊要　蔣嘉瑩見鏡頭手指指勁興奮

近年經常開Live以歌會友的黃翊，今年6月中因喉嚨不適「入廠」，經檢查後發現喉嚨生水囊兼胃酸倒流，幸只需改變飲食習慣，並沒大礙；之後他為羅敏莊演唱會擔任表演嘉賓，席間仲大唱大跳張國榮及梅艷芳的《蔓珠莎華》合唱版。日前在銅鑼灣做完嘢，黃翊便與友人在附近覓食，同行蔣嘉瑩見到記者鏡頭好Hyper，黃翊則冷靜得多。採訪：梁志明

80年代獲捧為「張國榮接班人」的黃翊，消失樂壇廿年間轉行經營飲食生意，4年前在TVB節目《流行經典50年》獻唱後，迎來歌唱事業第二春。除不時亮相電視及電台節目外，2018年更舉行了處男騷《黃翊最愛的你演唱會》，而近年他就頻頻做個唱嘉賓，得閒又於社交網開Live跟好友一起Jam歌。早前晚上近8點，《頭條日報》記者於利園附近見到黃翊 ，同行仲有經典劇集《我和殭屍有個約會II》主題曲《假如真的再有約會》的原唱蔣嘉瑩 and Friends。

搭港鐵出入
當日，身穿印上「貧困戶」字樣Tee的黃翊，孭住個大背囊再拖住個黑色篋，跟3位朋友邊行邊傾步行至恩平中心。沿途蔣嘉瑩發現有記者在場，她即不停笑望鏡頭，又興奮指住自己，似乎是向好友示意「有人影緊我」，相反單手插袋的黃翊卻表現淡定，全程都冇望過鏡頭。估計他們剛完成工作，所以選擇了一間日式炸豬排專門店食慶功飯，逗留約1小時，眾人便回SOGO搭港鐵站離開。