程美段自爆曾被「淫媒」睇中：肯去可能機會更加多

電影《#PTGF出租女友》將於下周三（22日）上映，首次拍電影的程美段飾演性感又主動的PTGF，經常對趙善恆（恆仔）作出挑逗，她直認初時感到有點緊張：「我覺得恆仔本身怕怕醜醜，但係好有禮貌，最後大家都要摸索，拿捏去到邊個位最舒服就放膽去做，唔使take咁多，寧願放膽啲一次過去做。」她稱拍攝前大家有溝通，加上恆仔做過導演，會令演員在拍攝時更順暢自然。

不過在拍接吻戲前，程美段一定要刷牙保持口腔清潔：「肯定自己個口唔臭先，食完lunch都驚有味，我嗌咗個芥蘭蒜蓉，都要刷個牙先。」至於今次拍戲最深刻的事情，她表示是一場自high戲，她覺得相當難拍：「同恆仔有纏綿戲，後尾係自己一個俾反應動作，自己幻想去投入，鏡頭淨係影我自己，我覺得仲難投入，反而同恆仔有肢體接觸會容易進入戲中狀態，最後我要飲威士忌先入到戲，如果唔係俾唔到反應。」程美段形容這場戲是「進行中」，「又嗌晒又俾晒反應，好興奮，冇人掂要自己掂自己扮有人掂，好有難度，要催眠自己。」由於只靠幻想，所以最後她都拍到略帶醉意。

做PTGF為錢，娛樂圈都有神秘飯局，有指女星出席會有利是收，程美段反問：「會俾返錢架咩？成日聽人講飯局，但從來唔明咩定義，食飯咪食飯，一班人朋友食飯，加個局字，飯局有咩特別？唔知代表咩。」她稱沒有出席過這些飯局，反而遇過疑似「淫媒」的人士，「淫媒？講真好似試過，我覺得有啲怪怪地，又唔知邊個，唔知有我電話，打嚟講啲嘢好奇怪，好驚呀，印象中係佢唔知點解佢知我係邊，叫我今晚去邊度識邊一個人，可能食吓飯唱吓K，問佢係邊個唔講，我懷疑係一啲我見過嘅人，但依家冇啦。」她覺得可能因為有時形象性感而引來這些人「注意」，問她是否守得住底線？她即答：「守得住，如果唔係我可能機會更加多。」