阿正瘋狂吹奏Edan靚仔 感謝對方為其電台節目唱主題曲

拍攝中的ViuTV綜藝《膠戰2》仍未透露何時播出，不過6位主持就好老友，在社交網頻頻更新拍攝情況。MIRROR成員Edan（呂爵安）就再次被公開黑圖，疑似是阿正（黃正宜）的人首先上載Edan熟睡的照片道：「Edan哥瞓着咗都好靚仔 By正小編」。

阿正又貼出Edan「炒車」照片，續表示：「攝影初哥想影相靚啲？影Edan哥啦！Edan哥上鏡程度可以話係驚為天人，就算影相手震都無損佢嘅顏值，有佢出現嘅相，基本上都一定會靚，所以攝影新手們，想你嘅作品靚？唔使理構圖光線光圈，只要有Edan，張相就一定靚晒！By 攝影系小編 正妹」。

雖然阿正和Edan經常「互相傷害」，不過其實都好老友，阿正近日結束商台節目《一位吖唔該》，轉為與好友Elsie一同主持《Bad Girl佬》。Edan為節目獻唱主題曲，令阿正表示很感動，笑言要做一晚限定的「爵屎」（Edan粉絲稱呼）。