譚俊彥開工連踩60小時致賀爾蒙失調 操肌上癮令狄龍擔心

譚俊彥（Shaun）今日接受電台節目訪問，他透露拍攝TVB劇集《換命真相》後緊接演出《拳王》， 因作息時間不足，加上生活壓力，致賀爾蒙失調，面上爆出紅瘡。他說：「嗰排我連續廠景，之後拍廣告到晚上七點再返公司沖個涼，然後再拍劇到第二朝早六點幾，連踩5、60個小時。因為疫情真係無錢，無晒外面工作就要睇緊啲。」

Shaun坦言那段時間因搏命工作而捱壞身體，故戒掉飲咖啡及醃製食物，面上皮膚用了一個月時間康復，現在則想增肌令身形更加均勻。談到當時為拍劇狂操身形可有令家人擔心？他笑說：「我爸爸（狄龍）成日叫我老婆畀多啲嘢我食。其實當時為《換命真相》拍封面要除衫，如果達到要有肌肉效果，真係唔係好食得嘢，但都係為拍戲啦！不過人哋放工瞓覺，我就上去跑步機，我有少少操練上癮，或者事業心，因為唔知幾時再有主角做。」