獨家丨鄧健泓只求老婆才華得到認同 耗盡六位數積蓄為石詠莉出歌

石詠莉(Sukie S)離開咗星娛樂後沉澱咗一年，今年以獨立歌手身份再闖樂壇，先後推出原創廣東歌《100歲備忘錄》、《期間限定》及啱啱派台新歌《Rainy Day詠莉日》。Sukie S感激老公鄧健泓(Patrick)出錢又出力，投資6位數字讓她出歌，Patrick就話最緊要Sukie S嘅才華畀人見到換嚟掌聲，令她開心兼自豪！採訪：方騫平 攝影：梁志明 場地：Da Filippo Trattoria @ Harbour City

相隔《期間限定》只係3個月時間，最近Sukie S再出新歌《Rainy Day詠莉日》。不過，作為幕後「老闆」嘅鄧健泓承認喺冇backup下係幾大負擔，𠵱家要開始計數：「因為我哋冇乜資產，所以有諗過《Rainy Day詠莉日》唔派台，但呢首歌喺年頭時同《100歲備忘錄》一齊做，做起咗又唔好嘥，同埋年頭承諾過會做3首原創歌。因此要喺有限嘅資源下拍MV，最後邀請咗33位『天使』用木顏色筆畫上圖畫，再將圖畫湊拼做成MV。」

做音樂預咗賺唔到錢

Patrick自爆2014年為咗幫Sukie S出唱片，要變賣一部車，加埋血汗積蓄嚟做資本，但當年賺到錢，相反𠵱家做音樂預咗賺唔到錢，但滿足感係一世嘅，較投資買個名牌袋更好，而且最重要係令老婆開心：「可能你哋聽落會好嘔，我眼中嘅Sukie S其實條件好好，明明聲音好又係高質素嘅女仔，點解會冇人聽到佢歌聲？我想佢啲歌畀人聽到，等佢唔好覺得自己冇用！」在旁的Sukie S承認「老闆」一直錫她：「去到咁上下歲數唔係求上一線位置，最重要係enjoy人生！」