古天后日誌｜港股暫無方向 集中火力吼強勢板塊

11月4日，天晴，風又唔大，呢兩日無啦啦暖返好多。美股繼續創新高，三大指數續創收市新高，道指再升104點；標指跟納指分別升29點及161點。而追蹤小型股表現的羅素2000指數周三收報2,404點，升42點，同創新高。美國聯儲局議息，維持利率不變，一如市場預期，亦宣布落實縮減QE，將於11月每月減少國債購買100億美元，以及每月減少按揭抵押證券(MBS)購買50億美元。

鮑爺表示考慮到美國經濟表現強勁，認為目前是調整資產購買政策的時機，但並不表示即將加息，主要由於美國就業市場仍有改善的空間，以達至全面就業的目標。而市場繼續關注美股第三季企業季績表現，已公布季績嘅標指成份股之中，83%業績超預期，惟市場仍然擔心供應鏈中斷、勞動力挑戰、商品通脹和新冠肺炎等風險。不過大部份美企業績好過期，係有助反映美股目前仍處於合理水平，美股一升再升都需要企業業績支持。

至於港股暫時無大方向，指數仍然處於上落市狀態，不過如果守到24800至25000水平，後市再向上收復幾條移動平均線機會仍在，問題係港股成交愈玩愈縮，唔少資金已被各項監管措施搞到心灰唔想玩，依家仲要面對美國跟其他國家可能實施嘅制裁，港股大部份股份都係中資企業為主，好難唔躺著都中槍。暫時唯有捕住幾個強勢板塊嚟玩，包括新能源股，好似龍源電力(00916)；汽車股(電動車)，龍頭首選比亞迪(01211)；電動車能源零部件股，贛鋒鋰業(01172)等等。而短線概念可以睇住雙十一概念股京東集團(09618)，暫時資金仍然留喺呢個板塊，至於ATMX又唔係無得諗，始終指數要上，都要靠呢幾隻重磅股集氣。

古天后

(徐狄怡，證監會持牌人)