Edan請纓為媽咪砌枱贏尊重 Wyman搞笑指可「枱」頭做人

MIRROR成員呂爵安（Edan）多才多藝，皆因鋼琴、小提琴他都識演奏，此外更是跆拳道黑帶高手，原來連砌傢俱也難不倒他，難怪要在IG出post炫耀一下。

Edan昨晚（4日）貼相貼片留言，指因早前換了部鋼琴，為幫屋企慳位，呂媽媽換了一張較細的飯枱，剛巧日前Edan難得早收工，於是決定回家幫媽咪砌好張新枱，他謂：「我好有型咁話：『唔洗搵人幫啦，等我嚟。』咁我諗住憑我細個砌模型嘅經驗，應該輕輕鬆鬆啦，點知竟然砌咗成2個半鐘，勁多零件，屋企又冇乜工具，搞到手都損埋。即刻同阿媽講，下次唔好慳嗰幾嚿水，畀人砌算啦。不過砌完後係幾有成功感嘅，同埋成功獲得阿媽同阿妹嘅尊敬同讚賞。妹：『嘩哥哥真係好犀利喎』媽：『生個仔果然都有啲用』。而家行出廳都威風啲，值得值得。」曾與Edan合作的填詞人黃偉文（Wyman）則搞笑留言：「以後可以『枱』頭做人。」

不過相信一眾「爵屎」卻很心痛，皆因見Edan貼出右手受傷的相片，見中指甩皮、兼掌心及食指又紅一大撻，要man要威都要付出少少代價。