古天后日誌｜港股成交萎縮 暫難有驚喜

11月10日，天晴，早晚天氣較涼，非常乾燥，注意保濕。雖然美股近日屢創新高，但俗稱「恐慌指數」嘅芝加哥期權波動率指數(VIX)靜雞雞上O左17.32點兩周高位，唔排除美股隨時出現調整，話口未完，隔晚三大指數回吐，道指跌112點；標指跟納指分別跌16點及95點。

雖然聯儲局一再強調通脹只屬暫時性，但一向較為鴿派嘅芝加哥聯儲銀行行長突然轉軚，指有跡象顯示，通脹成因較預期廣泛，包括來自租金上升壓力，所以物價升溫風險高於早前預期。目前通脹率遠高於長期目標水平，如果高通脹持續落去，則意味政策失誤，可能需要提早加息。雖然美股隔晚偏軟，但遊戲平台Roblox上季收入大增1.02倍至5.09億美元，表現遠超市場預期，其股價急升42.23%，呢個就係美股好玩嘅地方，就算市況出現震盪，總有個別股份熱炒。

相反港股繼續一潭死水，噚日成交額進一步縮水，港股暫時喺現水平拉鋸，暫未見突破，留意成交淡靜，反映無資金願意入場，暫時恒指會喺24500至25500之間上落。內地將會公布10月CPI同PPI，以及社會融資數據等等。市場預計10月CPI及PPI之間的增速差距將持續擴大。不過，隨着煤炭產能大幅提升至近年高位，帶動煤炭價格回落，兩者增速差距有望在11月逐步收窄，改善製造業利潤。10月社融預計將較9月回落，主要受到季節性因素影響。

內地企業前景仍然艱難，海底撈(06862)剛剛就要將300間客流量低嘅門店停業，條正過往擴張過急策略。內地疫情仍未穩定，加上政府採取嚴謹的防疫措施，火鍋行業復甦進展的不確定性甚高，暫時海底撈雖然似見底，但要回復昔日風光日子，仍要經過漫漫長路。

古天后一再強調，目前港股一池死水咁款，主要係內房債務危機威脅未除，市場始終擔心內房債務危機繼續發酵，或引發火燒連環船效應，令港股裹足不前，資金則於幾個受惠政策嘅板塊之間流動，但喺無新資金流入下，都係塘水滾溏魚，暫難有驚喜。

古天后

(徐狄怡，證監會持牌人)