吳若希做Working Mum學會取捨 願犧牲工作陪子女成長

吳若希（Jinny）日前作客TVB娛樂新聞台節目《StarTalk》，接受主播許文軒（Edmond）專訪，談到要兼顧家庭和事業，Jinny覺得做Working Mum是一件好叻的事：「好彩屋企都有好好嘅幫手，都想投放多啲時間畀屋企同小朋友，負荷太重我真係做唔到，而家我做嘅嘢會影響到另外一個人嘅未來，係好嚴重，所以要取捨，可能會犧牲自己嘅時間同工作，總之我希望做嘅嘢，可以令到另一半同小朋友開心啲。」

最近推出的新歌《火和火柴》的Jinny，自言滿足感好大：「今次參與到好高，由搵Eric Kwok寫歌做監製，到歌曲概念同MV都放咗好多心機，由頭到尾都係自己嘅心血，所以滿足感好大，好珍惜呢首歌。」她指以前甚少參與創作歌曲或畀意見，但現在心態已改變，唱歌不再為點擊率，亦不是爭取成績，因此多了自己的想法，希望獲得口碑多過成績。

首次參與歌曲和音，Jinny坦言感到緊張：「我本身唔識唱和音，當時仲開緊劇，完全冇時間練習，Eric叫我放心，佢話冇問題，一定錄到，佢仲話佢冇錄過一個人唔識唱和音。當我聽到佢咁講，嘩！寸到咁！我鍾意，結果我真係錄到，好有成功感！」