獨家丨陳庭欣工作重要未打算嫁入豪門 拍劇伏屍染血浴缸死得恐怖

陳庭欣(Tobe)在台慶劇《換命真相》中要伏屍染血浴缸，加埋陰暗燈光，連10億男朋友楊振源（Benny）都覺得好恐怖！Toby在劇中飾演情婦，她表示好難演，亦都係一個挑戰：「因為我永遠出現喺回憶中，對手戲唔多，反而多喊戲，角色相當沉重，好彩人愈大經歷愈多，增添咗情感。」。採訪：方騫平 攝影：葉君海

Toby最深刻拍浸浴缸自殺戲，因為喺凌晨拍，現場環境令人毛骨悚然，在場的劉佩玥都話驚驚。不過，Toby猛話好玩：「𠵱家我最想拍啲未拍過嘅嘢，好似跳樓戲咁，睇吓自己有冇畏高。(觀眾想睇你性感多啲！)哈！咁我着到好性感去跳樓咪得囉！其實性感與否最重角色配合，好似《踩過界》演跨性別人士，要合成女兒頭男人身去露兩點，呢幕令人好深刻。」

同男友相處舒服
疫情下陳庭欣於黃大仙置業供兩老安居，而她則進駐九肚山億元豪宅，對此，她唔想多講：「呢度唔關我事(男友租畀你住？) 總之唔係我租，好擔心啲新聞令人誤會我唔使返工，其實我每日都努力工作，疫情下仲搞咗個寵物頻道增加曝光率。」Toby未有結婚打算：「我對自己有信心，而且我哋相處得好舒服。結咗婚唔一定係少奶奶，大家睇得《溏心風暴》少咩。」