Kelly Online｜入境處處長 打第三劑科興

為保護自己同身邊人，政府呼籲市民接種第三針疫苗，盧駿梗係二話不說去打針啦。昨日去到北角渣華道體育館，排隊打針時，見到前面有幾個人有講有笑，有個官仔骨骨的男士，把聲仲好熟悉，好似入境處處長區嘉宏，我心諗高官都咁親民一齊排隊打針？唔係啩。近啲睇吓，原來真係佢，即刻過去同佢打招呼。問區Sir嚟呢度做咩呀？佢答話係嚟打針，之前佢已經接種咗兩劑科興疫苗，今日再身體力行，響應政府呼籲打埋第三針科興。問佢點解唔溝針? 區Sir話，之前注射兩劑科興後身體感覺良好，所以預約咗昨日繼續打科興疫苗。

傾傾吓就排到佢啦，佢臨走之前仲叫盧駿提家人同朋友快啲嚟打針，話防疫抗疫，人人有責！「接種第三劑疫苗既可以保障自己，又可以保障家人同其他市民健康，幫助香港盡早走出疫情陰霾，令大家可以回復正常生活。仲有大家都想早日通關去旅行嘛！」有呢啲咁盡責又親民嘅官員，認真唔話得！