古天后日誌｜美國忽然又出招 進一步威脅全球供應鏈

11月26日，天晴乾燥，今晚風勢增強。美股隔晚感恩節假期休市，今晚就只係得半日市。以為美股假期，港股可以安安落落，安然渡周末，冷不防美國忽然出招，喺中美元首視象會議後唔夠10日，當外界憧憬兩國關係緩和之際，美國竟將12間中資企業及機構列入「黑名單」。港股黑期應聲而下，再又回落至24500水平。

今次受制裁嘅實體或多或少跟半導體產業相關，亦牽涉量子科技領域，可見拜登政府對中國仍未手軟！而美國喺歐洲嘅盟友亦加入制華，意大利近日以半導體產業安全為由，再度阻中資企業收購當地半導體公司。今次遭列入出口管制實體清單的中資企業及機構，美國商務部喺聲明指出，有關實體及個人支持中國軍事量子運算應用。商務部長雷蒙多表示，全球貿易跟商業應該支持和平、繁榮，而唔係帶來國家安全風險，要保障國家安全，就要有效利用出口管制。中國嘅反應當然唔高興，商務部發言人束珏婷表示，美方做法唔符合中美兩國元首共識，不利於兩國，亦不利於全球產業鏈供應鏈安全及世界經濟復甦。

至於意大利就跟貼美國車尾，總理動用「黃金權力」，否決涉及中國企業浙江晶盛機電嘅收購案，原因係擔心半導體行業戰略安全。「黃金權力」係意大利保護「對國家利益具有重要戰略意義的資產」嘅相關法令，該國政府至今曾5度利用該權阻止外國實體收購意大利企業，其中4次涉及中企。

不過今次再搞制裁，無疑係向本來正威脅全球嘅產業供應鏈火上加油，有機會導致窒礙全球經濟復甦。國際貨幣基金組織（IMF）講過，中美爭霸下，兩強科技脫鈎，對全球經濟衝擊可能係中美貿易戰嘅10倍。中美之間沒完沒了嘅經濟科技戰爭，正令到世界技術朝兩個獨立體制趨向半球化發展。至於最終結果，古天后無水晶球，當然不得而知，但美國愈係逼得中國太緊，話唔定將激起中國更加發奮，美國阻止中國崛起嘅如意算盤未必打得盤之餘，更有機會逼得對方成為一個更難對付嘅對手。

古天后

(徐狄怡，證監會持牌人)