古天后日誌｜大市二萬四爭持 暫勿自亂陣腳

11月29日，天晴，天氣乾燥，晚上風勢較強。上周五經歷另類黑色星期五，美股顯著下跌，道指最多跌逾千點，收市跌905點，跌幅超過2%，創今年以嚟最大單日跌幅；標指跟納指亦跌逾2%，分別跌106點及353點。由於發現新南非變種病毒，歐洲多國已實施緊急入境限制，防止新型變種病毒傳播。世界衞生組織(WHO)周五召開緊急會議，該組織專家直言，新冠變異病毒株的傳染力或更甚於Delta病毒。旅遊及休閒股下挫，航空股受疫情消息拖累，高增長股受挫，反而疫情受惠股及疫苗股再炒起。

至於港股上周本來已表現疲弱，再加埋變種病毒消息踩多腳，今日恒指必定試穿24000大關，不過23600至23800料有支持，加上周五港股已先行一步，某程度上已反映變種病毒嘅利淡消息。其實變種病毒消息，古天后認為係美股進行調整嘅一個藉口，今次發現變種病毒，有別於去年剛發現covid-19病毒時，全球束手無策，目前除O左已有疫苗供應，發達國家接種率更超過五成，加上仲有治療口服藥快推出市場，對於變種病毒又唔使過份恐慌。

事實上，今早亞洲區時段開始，道指期貨已見反彈，料港股低開後，留意今日期指結算後發現，港股走勢或未至於想像中咁差，仍有貨喺手，切勿自亂陣腳，待反彈再選擇性減持倉位，保留強勢股份，或留意強勢股份或者係撈貨機會。至於受疫情影響較大嘅出行股，旅遊股等，待反彈減持。

本來內地嘅經濟復甦似有放緩跡象，若然疫情變得反覆，窒礙經濟復甦，唔排除內地或再放鬆貨幣政策，進行降準等措施，屆時中港兩地股市料有反彈，今日無必要自亂陣腳，一動不如一靜，待大市反彈再作定奪。

古天后

(徐狄怡，證監會持牌人)