古天后日誌｜周末前夕港股難有發揮

12月3日，天晴，早晚相當清涼，天氣非常乾燥，記得飲多兩杯水。話O左變種病毒Omicron對股市殺傷力有限，雖然美國加州發現首宗本地個案，但眾議院達成協議，將債務上限日期推遲至明年2月18日，聯邦政府有望停擺，美股向好，三大指數向上，道指升489點；標指跟納指分別升49點及117點。

大行細摩認為，Omicron出現雖然引起股市一拋售，不過美股回調反而係一個吸納好時機。雖然Omicron傳播力更為驚人，但目前數據顯示其致命率較低，睇返傳染病史發展嚟推測，Omicron或令已維持接近兩年嘅肺痰疫情，演變為類似季節性流感嘅傳染病，終止今次世紀疫情。如此一來，對經濟重啟相關股份有利。

不過另一大行大摩就表示，Omicron對中國嚟講就未必發揮到回復正常生活嘅力量，事關中國採取清零政策，即使能減輕對製造業影響，增加供應鏈韌性嘅同時，清零政策限制服務業成長，令服務業繼續受壓。至於香港就唔使大摩講，內地行得清零政策，即係香港都一樣，即使依家正吹風，中港兩地可通關，但作為一個國際開放型城市，香港僅對內地正常通關，唔能夠對全世界進行開放通關，香港經濟仍受影響。

港股經歷過上周再向下尋底，到今個星期終止跌反彈，可惜目前反彈力度有限，23800點更變成短線阻力，要睇睇恒指喺23500夠唔夠支持定力，希望暫時守到住23500點。ATMX仍然係有波幅，冇升幅格局，暫時都唔使對大市抱太大期望，要扭轉目前弱勢，恒指要上返24000先叫有O的睇頭，嚟到星期五周末前夕，缸邊友都傾向減磅，今日港股難有發揮，唯有按兵不動，等下星期再作定奪。

古天后

(徐狄怡，證監會持牌人)