瑪姬開慈善Show唱梅姐歌致敬 黃建東唱爆笑《平安郁》壓軸

《瑪姬 x 黃建東 Max Your Love 慈善音樂會》日前圓滿結束，兩人表示疫情期間未能合作為晚宴擔任司儀及表演嘉賓，故此大家都很珍惜這次能夠jam足一晚的機會，更提前兩日綵排，非常認真。當晚所籌得的善款不扣除任何成本，全數撥捐受惠機構「香港復康力量」，以推動傷健共融，締造平等機會。

早前二人結伴去觀看電影《梅艷芳》，深受感動，希望藉着音樂會向梅姐致敬，而在梅姐眾多首經典金曲中，二人竟不約而同鍾情《赤的疑惑》！瑪姬透露：「東東好有風度，最後都將首歌拱手相讓畀我唱，而佢自己就迎合觀眾嘅點唱翻唱另一首經典《女人心》，仲即場將歌詞稍微改動為《男人心》去唱出另一種感情。」而瑪姬為了唱好梅姐的《赤的疑惑》亦下了不少功夫，「除咗麻煩歌唱老師幫我練習咗幾個星期，我仲上網搵晒所有曾經翻唱呢首歌嘅片嚟反覆觀摩，希望能夠以最佳狀態演繹。」

演出期間，東東繼續貫徹其攪鬼作風，瑪姬笑謂：「唔知點解隔咗兩年無合唱啫，有幾首以前登台經常合唱嘅英文情歌，佢唱唱吓會突然轉咗用肥媽Maria Codero嘅腔嚟演繹，攪到我要一路深情唱、一路忍住笑。」

而音樂會壓軸歌曲是由東東創作的《平安郁》，瑪姬笑指歌詞實在太趣怪：「綵排嘅時候我已經失控笑到跪咗喺地下完全唱唔到，post咗條片上社交平台之後，反而有好多網民留言話好期待正式演出，好彩最後都順利完成。」