古天后日誌｜電商股取京東棄阿里

12月8日，天氣相當乾燥，氣溫略為回升，但早晚與日間溫差較大。美股隔晚延續周一升勢，道指再升492點，標指升95點，納指更升逾3%，升461點。瑞銀表示，投資者對於美股的態度「高度謹慎」，惟反映企業狀況的ISM製造業採購經理指數(PMI)卻維持穩定，這通常預示股市將錄得強勁的回報，可視為轉勢訊號。雖然短期內大市仍受疫情消息困擾，但瑞銀維持明年底標指5100點的目標，尤其看好中型股及價值股表現。至於行業方面，則偏好非必要消費品、能源、金融和醫療保健。

美股話咁快就接近完全收復之前失地，港股喺北水連日錄得淨流入下，恒指亦有機會重上二萬四關，但反彈之勢能夠持續，都要靠成交量支持。雖然香港暫未受變種病毒Omicron大舉襲擊，但本身嘅內房債務問題以及中概股退市風險仍困擾港股。

雖然人行降準以緩解企業財困，但目前只能令港股喺現水平得到支持，暫未能刺激港股大舉攀升。目前投資者宜觀望本月的中央經濟工作會議，留意監管環境會否回穩，以及下周美國聯儲局議息會議，會否宣布加快收水。恒指能否企穩24000關仍屬關鍵，上面24500至24800更加阻力重重。

至於大家最關心嘅ATMX，維持有波幅，無升幅格局，而噚日反彈較顯著嘅阿里巴巴(09988)，股價未能重上130元水平之上，難言轉勢，頂籠都係反彈，尤其股價持續下向咁長時間，上面累積嘅蟹貨到嚇死人，有貨喺手就無計局坐，但未有貨喺手，要買電商股，寧願300邊吼返京東(09618)好過。

當然今個月係年結，傳統會有粉飾櫥窗效應，尤其港股較年初高位已回O左唔少，而好多股份估值亦已回復至合理水平，只係市底偏弱，即使有粉飾櫥窗亦唔會太進取，喺月底聖誕新年長假期前，只宜輕倉減低假期風險。

古天后

(徐狄怡，證監會持牌人)