古天后日誌｜港股反彈持續 蘋概股短線走強

12月9日，天晴，相當乾燥，周末期間氣溫略為回升，但早晚溫差仍大。變種病毒Omicron似乎對疫情影響有限，雖然變種病毒傳染力勁強，但殺傷力低，重症及死亡率低，市場已消化相關因素，美股重拾動力。隔晚美國靠穩，其中標指更連升三日，再升14點，極為接近上月18日嘅收市新高。道指跟納指則分別升35點及100點。

美股標指今年累升22%，唔少華爾街分析師認為美股升勢可持續至明年，對明年底標指預測中位數為4910點，較隔晚收市價仍有5%升幅。不過始終美股估值唔平，明年回報率將遠低於今年及過去10年平均水平，而標指過去十年平均回報率達13.6%。

有分析指肺炎疫情喺明年進入夏季後，病例會持續下降，死亡降亦會減低，預期對股市有提振作用。但下半年持續加息，通脹高位跟企業收入增長放緩，將對股市帶嚟負面影響，而聯儲局態度將會係2022年股市走勢嘅關鍵。

有消息指蘋果公司要求供應商加快生產旗下手機iPhone，股價升2.2%再創收市新高，預期蘋概股今日可做好。古天后噚日喺聊天室上午時段，已建議買入舜宇光學(02382)，即管睇下有冇本事重上240元水平，企穩再向250至260元挑戰。

港股呢個星期走勢大大改善，恒指一旦能企穩於24000水平，有機會進一步向上，不過24500阻力唔細，留意能否企穩。暫時指數重磅股走勢漸入佳境，ATMX之中，當然係騰訊(00700)跟美團(03690)行先一步，騰訊阻力暫時喺475-480元，而美團阻力剛好係250元，企檼下個阻力260元。家陣港股步步皆辛苦，短炒有糊食就唔好客氣，畢竟港股成交未能配合，暫時只能視為反彈，至少要企穩條20日線24485，再重上條50日線24882，港股先叫做由弱轉強。

　　古天后

　　(徐狄怡，證監會持牌人)