黎明呻呆等個幾鐘：呢行就係呃呃𠱁𠱁

　　（星島日報報道）陳柏宇（Jason）一連兩場《FIGHT FOR》演唱會前晚在紅館演出，太太符曉薇抱三歲女兒陳羿辰到場睇騷，一班好友包括黃妍、小塵埃、布志綸、江伊晴和老公蕭唯展等齊齊捧場。當晚除了有組合Nowhere Boys任嘉賓打氣外，天王黎明更驚喜現身，大放金句力撐Jason！
　　陳柏宇以紅色笠頭神秘裝束現高唱《對得起自己》打頭陣，之後熒幕播出他的讀白，以漫畫方式交代童年，獻唱《尊嚴》時，身旁更放有一張單人牀，呼應兒童院情節；而唱到《結》時有8位大隻赤膊男，半祼激凸跳舞。一口氣唱足14首歌後，Jason才開口說話，介紹嘉賓組合Nowhere Boys出場，合唱後主音Van多謝陳柏宇給予他們首次踏上紅館舞台，希望有機會重踏紅館開騷。
　　Jason眾多海外親友未能返港睇騷，身在加拿大的公公婆婆以及陳媽媽齊拍片為他打氣，Jason表示：「成世人未試過咁盡力做一件事，以下個訊息唔單止帶畀你哋，仲畀埋我，最終奮鬥目標無論能否達成，路途上唔止你一個人，送畀你哋我嘅新歌《有我》。」Jason又感觸指時隔三年再開騷，感受最深是「無常」，他稱：「要時刻珍惜，守護你所有嘢，對得起自己同你愛嘅人，多謝你哋來到聽我嘅歌，你哋令我珍惜每次上台機會，你哋每一個人令陳廣偉變成陳柏宇，沒有你、我甚麼都不是。」
　　而當晚最驚喜的莫過於天王黎明擔任嘉賓，盡顯「金句王」幽默本色，更稱Jason為「師兄」，讚他顧家：「又幫我拍MV，有緣就會見到，做呢行咁耐，只要我早到運氣就會唔好，今日話9點30分出場，我8點50分就到了，現在10點20分了。」Jason即代大家講對不起，黎明又笑指想唱《越夜越有機》但卻變了《越夜越眼瞓》，還說：「唔緊要啦，呢行就係呃呃𠱁𠱁就成世，講老實說話係朋友，講真心話先係摯友，等個幾鐘都唔緊要啦，在後台聽到音質好、聲音又好，啲努力、加油唔使啦，Jason係一個好好歌手！」而昨日（11日）是黎明的55歲生日，壽星仔放下大日子為Jason擔任嘉賓、相當畀面，未知能否趕及回家好好慶祝呢？