古天后日誌｜港股暫宜打游擊 未宜重鎚出擊

12月14日，部份時間有陽光，天氣乾燥，晚間風勢較大。英國出現Omicron病毒感染後死亡個案，打破之前大家都認為變種病毒Omicron傳染性高，殺傷力低嘅觀念。美股周一全線下跌，道指跟標指跌少於1%，分別跌320點及43點，而納指跌幅超過1%，跌217點。

由於變種病毒殺傷力不容忽視，國際自由通關變得遙遙無期，波音下跌3.7%，係跌幅最大成份股。雖然蘋果公司隔晚跌逾2%，但有大行調高其目標價，更指蘋果有望成為第一間市值達到3萬億美元嘅美國上市公司。雖然印度神童言之鑿鑿，指12月14日，即係今日之後，全球將大禍臨頭，全球將面對七大災難，包括極端天氣、能源短缺、電力短缺、疫情、供應鏈中斷、饑荒，以及經濟動盪。家下講中第一樣係疫情升級，但其他咁多項所謂災難，其實正持續發生，各國早有準備兼已有對策，古天后就認為唔好自己嚇自己，既來之，則安之，過份擔心亦無補於事，地球仍然日日轉，日子都係咁樣過。

不過喺美股再逼近歷史高位，A股上證指數亦向住年年高位推進之際，港股維持悶局，繼續死蛇爛鱔，表現令人失望。噚日早段恒指高開高走，可惜20日線( 24245)得而復失，全日喺10日( 23844)至20日線之間徘徊，以為努力築底之際，冷不防隔晚美股插水，今日港股當然又跟跌唔跟升嗰個衰款。

無論港股呢期升升跌跌都好，成交始終未見起色，年底前要吸引大規模流入港股機會不大，外圍正關注美國會否加快加息，流動性問題對港股係利淡。事實上，近期數據顯示美國經濟復甦，並加速O左從能源、食品到消費品在內各種商品價格上漲，通脹變得無可避免，成為聯儲局加快收水嘅理由。

過多兩日就係聯儲局會有議息結果，同時有美國零售銷售數據。同日，歐洲央行亦會做出利率決定，又有美國工業生產數據公布等。其他值得關注嘅數據包括今晚生產者物價指數(PPI)、明晚嘅紐約聯儲製造業指數、周四嘅建築許可和房屋開工、初請失業金人數以及費城聯儲製造業指數等都非常重要。估計呢O的數據都會左右市場走勢，即使目前大部份大行仍睇好美股，但咁多數據公布，都要保持高度戒備。一旦美股有乜冬瓜豆腐，本來弱勢嘅港股難色再被拖累。

雖然港股現價估值已相當便宜，但缺乏資金流入支持，港股暫難有起色，依家嘅策略都係打游擊為主，盡量短炒，不宜持倉過重。

古天后

(徐狄怡，證監會持牌人)