古天后日誌｜長假在即 一動不如一靜

12月15日，日間溫暖，短暫時間有陽光，晚上有一兩陣微雨。市場仍然觀望聯儲局議息會議結果，而美國11月生產物價指數(PPI)增幅創下11年來新高，顯示通脹壓力高企。三大指數腳軟，道指跌106點；標指跌34點；納指跌175點。近期納指似乎跑贏道指跟標指，原因係美股部份資金流O左去玩傳統股，增長股唔少更錄得頗大嘅累積跌幅，反映美股資金傾向較為保守，主要係有大行相信，當疫情放緩，以及利率趨升令融資成本提升下，高增長企業嘅收入或減少。

至於喺通脹壓力下，市場已建立聯儲局明年加息預期。大摩嘅James Gorman認為，加息除O左係應對通脹嘅其中一個方法外，仲可以為將來面對經濟衰退時，積穀防饑。佢嘅睇法係，目前經濟增長強勁，係加息好時機，加息唔單止不唔會阻礙經濟復甦，反而能穩定經濟，惟可能會喺一段時間內擾亂市場，強調目前市場需要係經濟平衡。

內地召開中央經濟工作會議，提出經濟發展面臨需求收縮、供給衝擊、預期轉弱三重壓力，並指跨周期及逆周期政策要有機結合。內地今年重心原本放喺跨周期，意外重提逆周期，反映經濟下行壓力唔細。明年經濟工作主調為「穩」字當頭，預計政策趨向積極「穩增長」。配合財政政策措施，預計將有新一輪降稅減費及刺激消費措施，估計政策可利好消費股，包括家電、體品及汽車板塊等等。而政策傾斜板塊如新能源等，亦會係明年重點投資嘅主調。

不過接近年底，暫時唔適宜重倉，嚟緊有聖誕及新年假期，長假期都係輕倉及以短線操作為主。待明年開局觀察後再重新配置，收集政策利好板塊股份，12月份一動不如一靜。

古天后

(徐狄怡，證監會持牌人)