麻雀鬥室丨鄧兆尊爆享齊人福最緊要支票簿 陳彥行低胸輸畀家燕姐

由薛家燕擔任「話事人」的TVB綜藝遊戲節目《麻雀鬥室三決一》最近玩集體回憶，邀請經典劇《皆大歡喜》的「衰舅父」阮兆祥、「萬貴妃」車婉婉、「三姑娘」陳彥行（行姐）和「排骨女婿」鄧兆尊做嘉賓，夥拍林盛斌（Bob）、戴祖儀、鄭衍峰及吳若希「四大護法」齊齊打馬吊！

今晚（22日）播出的第十集，吳若希竟大膽「查問」兆尊如何享齊人福，兆尊爽快地回應謂：「好容易啫，你知道本Cheque（支票簿）擺邊就得！」兆尊再自爆：「佢哋唔可以一齊埋枱，係危險禁地。」又大呻享齊人福苦處！

經典劇《皆大歡喜》四位演員聚首。

行姐低胸裝上陣，話要轉移對手視線。

今晚一集，兆尊就會爆點樣可以享盡齊人福。

祥仔笑家燕姐係TVB唯一可以贏高海寧嘅人。

而昨晚（21日）一集就被行姐搶風頭，笑言「專登着低胸啲」轉移對手視線，但對住家燕姐都要投降，並說：「今晚最低胸嗰個係家燕姐！」鄭衍峰搞笑問：「《皆大歡喜》啲麻雀戲係咪真打？」阮兆祥直言：「係㗎！每次都要花時間去砌牌，配合番個劇情，最嘥時間！」期間眾人更連環爆金句：「唔怕高、唔怕矮，最緊要啱位！」、「早打早着，遲打瞓唔着！」

之後輪到「絕世好牌」環節，祥仔出動紅底橫請來「慈姑」家燕姐上陣打牌，但穿低胸裝的家燕姐因怕走光「姐手姐腳」，祥仔見狀即笑言：「你係TVB唯一可以贏高海寧嘅人！」全場爆笑。雀局期間，鄭衍峰竟大膽想同家燕姐「搶碰」，家燕姐即霸氣謂：「你知唔知《皆大歡喜》冇人敢搶我碰？！」家燕姐最終順利食糊，但後來戴祖儀發現家燕姐原來有機會自摸時，眾人即上演《皆大歡喜》番外篇，齊齊玩「時光倒流」讓家燕姐如願「自摸」、皆大歡喜！經過一輪激戰，行姐暫時領先可以玩Bonus Game，最終贏得40罐鮑魚！

今集係《皆大歡喜》Re-U，大家 輪流拋金句。