星島獨家｜魏浚笙出招冧「咖啡豆」 一腳踢親手「炮製」Coffee

今年23歲的魏浚笙( Jeffrey)擁有混血靚仔樣，近年彈出兼成功入屋，獲得一大班「咖啡豆」（Jeffrey粉絲稱號）支持，每次出席活動都全力應援，為感激粉絲無條件支持，「男神」Jeffrey決定踩入旺角充當一日咖啡師，親手「炮製」咖啡回報粉絲，即使全程一腳踢，Jeffrey興奮表示：「今日冇難度，好開心！」

文：張樂施  圖：鄧國良

去年憑參加ViuTV真人騷《調教你男友》彈出的新一代小鮮肉魏浚笙（Jeffrey），近年更成為各大時尚品牌寵兒，工作接踵而來，而每次出席活動，亦例牌有一大班「咖啡豆」（Jeffrey粉絲稱號）到場支持和應援，Jeffrey對於大家對他無私的愛，無言感激，他表示自己同樣愛錫每一位支持他的人，為了和「咖啡豆」有更多互動，Jeffrey 一有空閒便會在Fans Group和粉絲聊天，活動後情況許可都會爭取時間和大家合照留念！Jeffrey坦言：「好感恩，因為他們出席支持唔係就咁得閒經過，每一次都係專登出嚟，當人哋願意去花這個心機支持我，我都會想對他們好一點，我會爭取和粉絲有更多的互動。」

Jeffrey一直都希望有機會有粉絲聚會大家多點相處，可惜之前疫情影響未能舉行，最近本報誠邀Jeffrey放低一日偶像身份，「男神」踩落旺角平民Cafe充當一日咖啡師，難得有機會跟專業咖啡師學沖咖啡，Jeffrey希望自己親手「炮製」的咖啡能夠有機會給粉絲品嚐，所以拍攝當日，邀請了不少「咖啡豆」做顧客，除了沖咖啡，Jeffrey更即場做埋侍應替大家落單推介食物，期間有粉絲「刁轉」落單，例如咖啡只要五粒冰，意粉餸菜分開上，Jeffrey都照單全收，最後仲親自捧餐兼為粉絲調製飲品，場面溫馨熱鬧！

當了一日咖啡師，Jeffrey 直言十分享受：「其實佢哋已經好好，佢哋刁鑽嘅位我諗都係講吓笑，不過體驗過覺得如果匆忙嘅時候落單應該唔會落唔切，會漏單，或者餐牌上面食物嘅名太相似就會幫人落錯單，今日就有少少咁嘅情況出現！」沒有太大出錯，Jeffrey對自己表現信心十足：「我覺得今日冇難度，係好開心！因為其實係我興趣，本身自己鍾意咖啡，今次機會可以學到更多唔同嘅沖調方法，學識到新技能係開心！其實很多工作都想嘗試，例如地盤、整坑渠、修理門鎖、總之學到新嘅嘢就ok!如果有機會再同fans聚會，我會想去vintage店舖做服裝售賣員，咁我就可以幫佢哋襯衫，這個也是我的興趣！」

 

Jeffrey專注聆聽職業咖啡師的講解。

 

 

Jeffrey承認落單時曾經出錯。