古天后日誌｜內房股繼續抽水 暫仍避之則吉

1月13日，早上大致多雲，午後斬轉天晴，早晚清涼，天氣乾燥。美國上月通脹飊至7%近40年新高，但符合市場預期，市場消化相關數據，美股隔晚靠穩，三大指數升幅雖收窄，但仍保持上升。大行普遍仍睇好美股後市，因為去年第四季美企盈利增長普遍接近兩成，表現強勁對美股有支持，只係擔心疫情跟通脹問題令美股表現更為波動。雖然受到加息預期衝擊，上月科技股表現較弱，但踏入1月資金重新入市，反映美股對投資者仍具吸引力。

至於港股噚日愈升愈有，喺美股氣氛好轉下，港股裂口高開逾300點後升勢持續，恒指以全日高位24402點收市，升663點，恒指收復50日線( 24046)，進一步向住100日線( 24658)進發。北水繼續得淨買入，噚日港股通淨買入51.9億元。

重磅科技股係升市火車頭，ATMXJ五大功臣為恒指貢獻395點，佔大市升幅近六成。不過內房股持續疲弱，雖然有口痕友話內房債務炸彈爆得七七八八，但為O左解決資金問題，內房股難免要向市場抽水，今日輪到融創(01918)批股，折讓逾15%批逾4億股股份，配股價每股10元，即管睇睇今日能否守住配股價。不過內房股接二連三抽水無可避免，預計呢個板塊走勢維持反覆，真係有心收集，都只係集中幾集較強勢嘅龍頭，其他次一線嘅內房股，仍然避之則吉。

重磅科網股預期升勢持續，但噚日急升過後，今日有回吐亦正常，畢竟噚日急升令唔少科網股均見超買，抖抖氣亦不為過。只要大市仍守穩50日線之上，港股中線走勢料有改善，如稍後能進一步收復100日線，更有利走勢由弱轉強，值得留意係去年10月反彈至100日線後，於該平均線附近形成島形走勢，其後大市再向下尋底。今次要留意一旦恒指能挑戰100日線，望能靠穩進一步向25000水平推進，否則又喺100日線停滯不前，唔排除島形走勢再現，港股繼續弱勢惡性循環。

古天后

(徐狄怡，證監會持牌人)