古天后日誌｜港股估值低廉 後市仍可看好

2月7日，多雲，有幾陣雨及薄霧，間中有幾陣強風，天氣繼續陰陰涼。上周五美股個別發展，道指跌21點；標指跟納指則分別升23點及219點。至於港股喺虎年首個交易日做好，狂飈近800點後，夜期跟ADR均見靠穩，且看今日升勢能夠延續。 今日北水重臨，而本周焦點將落喺美國1月份通脹數據身上，而12月份美國金CPI創近40年以嚟最高，1月嘅通脹數據將對聯儲局收水帶嚟啟示。此外，俄烏局勢緊張，有指俄軍已部署足夠兵力攻打烏克蘭，刺激原油期貨升至7年高位，投資者繼續關注全球通脹升溫情況，繼而令資產市場表現出現分化。 目前支持港股繼續向上最大因素，當然係低廉嘅估值，今日北水重臨或令恒指今個星期繼續向上推進，首個目標當然係25000水平。睇返美匯指數回落至96以下，環球資金流竄情況出現緩和。在外圍逐步趨穩下，有利港股伸延穩好發展。 不過近日歐洲央行以至英倫銀行，已進一步確立西方國家央行採取偏鷹貨幣政策，跟內地較為寛鬆嘅貨幣取態大相逕庭，而香港處於貨幣政策差嘅資金流向之中，未來各板塊表現只會更加分化。而資金近日流入國際金融股，除銀行股外，保險股亦值得留意，而古天后心儀嘅保險股，首選仍然係友邦(01299)。 除O左資金追捧嘅國際金融股之外，受惠國策嘅板塊之中，新能源股份將繼續得到資金垂青，當中龍源電力(00916)於1月下旬已成功回A，不過消息落實，反成股價整固嘅理由，不過此股喺過去4個月大型長方型上落整固嘅運行走勢未見破壞，暫時仍然可以高沽低揸炒上落。事實上，對新能源發電可以維持長線睇好，而國家發改委、能源局發布了關於加快建設全國統一電力市場體系指導意見，其中，指出要提升對高比例新能源適應性，對新能源未來發展進一步確認，對以營運風電為主嘅龍源電力來說，亦係正面利好的消息因素。

古天后

(徐狄怡，證監會持牌人)