獨家丨薛影儀「爆紅」月賺萬元好滿足扮財神唱賀年歌繼續冇表情

2022-02-08 23:00

37歲「黃花閨女」薛影儀失落亞姐而爆紅，更成為「ATV生啤」，自去年8月底被亞視私有化後，短短5個月接咗幾十個Job，工作排到農曆新年前，經理人林寶玉爆阿儀今年仲會出埋歌。扮演財神的阿儀日前先熱身，由4位穿着高叉旗袍的亞姐譚夢娜、張可盈、林海茵及陳美濤伴隨下大唱賀年廣東歌。採訪：方騫平攝影：沈健程

亞姐譚夢娜(左起)、張可盈、薛影儀、林寶玉、林海茵及陳美濤向讀者拜年。

阿儀同亞姐齊齊拍賀年歌MV。

全新創作嘅賀年歌喺大馬各大網上平台及K場播出，歌詞有埋阿儀金句「阿儀不紅，天理不容」相當搞笑。當日扮財神嘅阿儀雖然貫徹執金都唔識笑，但其實好High，仲急不及待將賀歲歌MV花絮片段放上網，意外將有關片段提前曝光。縱使發生咗一場小風波，不過，阿儀係帶出正能量及歡樂，大馬製作單位點會嬲得佢落呀！

阿儀首扮財神依然冇乜表情。

薛影儀主動拍片，叫廣告商搵吓其他亞姐做Job。

開心share工作畀亞姐
首次做財神嘅阿儀依然係冇乜表情，問到鍾唔鍾意扮財神？她只淡淡然表示：「唔知呢！開心啩。」身邊亞姐卻表現得雀躍，譚夢娜爆阿儀反而羨慕她們有得着旗袍，夢娜笑說：「我羨慕佢就真，財神得一個。」阿儀又主動話：「其實可以搵吓其他佳麗，佢哋比較少job，冇我搵得咁多。」當阿儀被記者追問去年收入時？她突然醒目地耍走記者：「秘密嘢滿意囉！(咁有冇6位數？)梗係冇咁多…我會留起嚟用喺屋企度。」阿儀咁識得為戰友設想，夢娜話要請佢食飯；可盈話黐佢多啲會有運行；林海茵指佢係開心果；陳美濤讚阿儀好善良，林寶玉指阿儀想一班人齊齊拍嘢會開心啲。