古天后日誌｜騰訊阿里被納入惡名市場名單影響有限

2月18日，多雲，間中有一兩陣雨，天氣清涼。俄烏局勢持續緊張，美股隔晚下挫，道指更創今年以來最大單日跌幅，跌622點，報收34312；標指則跌94點，報4380；納指則跌2.88%，跌407點，報13716。美國駐聯合國大使周四表示，俄烏衝突已經到O左「關鍵時刻」。烏克蘭此前指責親俄分裂分子襲擊邊境附近一個村莊。 美國總統拜登警告，俄羅斯入侵烏克蘭嘅威脅非常高，並稱襲擊可能喺「未來幾日內」發生。地緣政治局勢嚇怕投資者，業績未能達標嘅美企，派完成績表固然要捱沽，就連業績好過預期嘅美企，派完成績表後，股價一樣要插水。

至於港股噚日表現都算係咁，雖然盤中曾受俄烏局勢消息拖累，中午恒指曾於24700水平，於短短幾分鐘內急跌至24500水平，不過午後再度反彈，總能守住多條移動平均線。不過美股隔晚走勢咁差，今早港股難免受拖累，可能再次考驗24400至24600水平，剛好係10、20及100日線之所在。

另一方面，兩指數權重股騰訊(00700)跟阿里巴巴(09988)被美國政府列入「惡名市場」(notorious markets)名單，指控該兩家公司嘅網站涉及銷售冒牌商品。USTR將42個網上市場與35個實體市場列入「惡名市場」，當中首次列入AliExpress與WeChat等中國主要網上平台。美國貿易代表辦公室喺報告中表示，其特別列入一O的網上咎實體市場，因為嗰批平台反映出全球假冒和盜版問題，而且該批市場嘅侵權活動規模可能對美國知識產權所有者、工人、消費者和及經濟造成重大損害。 不過呢個消息古天后又唔係太擔心會影響到兩股嘅股價大跌，講真內地網站賣假貨都唔係今時今日嘅事，況且難聽O的講，願者上釣，其實明知價錢跟真貨相差一大截，唔係天真到以為以用一兩折，甚至更低價錢買到真貨，估計呢個所謂惡名市場名單，都只係「溫馨提示」一個，對兩股實際營運影響幾乎等於零，即係唔會對其股價購成重大影響。 港股今日睇住兩個位，包括24400及24600，若然呢兩個位仲守得住，後市又唔使太過悲觀，但要提防俄烏於周末期間真係開火，暫時都係輕倉上陣，未宜進取。古天后

(徐狄怡，證監會持牌人)