姜文杰結婚只有雙方爸爸見證秦沛太Man喊咗未必睇到

2022-02-22 18:00

姜文杰（Benji）擇好吉日，在「全2一刻」宣佈婚訊！疫情關係，姜麗文未能現身親證哥哥簽紙結婚，她今日回覆本報時謂：「雖然因為疫情大家都未可以搞到個婚禮但係就算喺video call嗰度睇住佢哋簽紙都覺得好感動！忍唔住喺錄影廠喊出嚟 haha。」

Benji受訪時直言疫情期間為保障大家安全，所以沒有擺酒，只有雙方爸爸陪同見證簽紙儀式。問到一對新人及爸爸們有沒有感動落淚？姜文杰笑言：「老實講，今日大家都幾感動，不過我老豆咁Man，我又全神貫注睇住我老婆，所以就算爸爸喊咗我都未必睇到 🙈。妹妹雖然工作中，但剛剛都一齊facetime成個過程，算一齊見證啦😂。」至於補擺酒方面，他指一切等疫情過後再做決定。可會同妹妹姜麗文一齊擺酒，熱鬧一點？他笑說：「哈哈哈.. 這個主意唔錯，可以考慮下。」

姜文杰笑言掛住望老婆，爸爸秦沛有冇喊都唔知。

二人與愛犬一齊影婚紗相。

Benji與模特兒女友李泳淇（Rain）拍拖9年，終結束愛情長跑。原來二人在2008年於節目邂逅，當時只有18歲的Rain因參加商台《十人巷》被安排到當時Benji主持的音樂節目學習做主持人工作，其後四年沒有見面，直至2013年才再次遇上對方後相戀。問當時是否一見鍾情，Benji說：「18歲嗰次當然唔係，模糊記得當年有個咁樣嘅女仔上節目Training，係咁多 🙈，內在外在都一樣，對我嚟講我老婆都係完美✌。依家佢身兼Model，亦係煮飯婆！」

至於秦沛（Paul哥）見證兒子姜文杰註冊結婚，他受訪說：「心情當然開心，前一晚瞓得好好，有人代我管教個仔。註冊過程好順利，我都有用手機拍照，因限聚令關係，只有男女雙方的父親在場見證，儀式後沒有特別安排，各自回家。」問他是否好感動？Paul哥表示有少少，但沒有眼濕濕，反而親家較感動。至於他給新抱李泳淇（Rain）多少分？Paul笑着說：「我得一個仔，一個新抱，無得比較，總之就滿分，阿Rain好叻又乖，而且好好學。」是否恨抱孫？他表示要下一代自己計畫，要衡量工作、經濟及將來小朋友讀書等等問題，Paul哥本身的父親早離世，照顧細佬妹的責任落在他身上，加上照顧自己兩個子女已經好疲倦，他笑言玩孫就可以。