獨家丨張偉文留院8日病情惡化經理人方俊憂心證實：唔樂觀

2022-02-27 11:00

第5波疫情嚴峻，確診人數不斷上升，多間安老院舍爆疫，人稱「靚聲王」嘅69歲張偉文喺太子一間安老院舍受感染，由於他有長期病患加上不良於行，於2月19日早上被送往廣華醫院，據本報收到獨家消息，得知至今留醫8日嘅張偉文近日病情轉差，據知，連日來張偉文持續發燒，肺部一邊變花，血液含氧量低，要用4度氧氣機幫助呼吸。本報記者向張偉文經理人好友方俊(Aman)了解，他憂心忡忡證實已接獲醫生電話通知，交代張偉文病情惡化嘅狀況，目前用類固醇進一步治療，更表明病情不樂觀。

張偉文確診後留院8天，日前病情開始轉差演變成肺炎。

方俊對張偉文有情有義。

過年前方俊安排張偉文再做腰椎手術，當時狀況良好。

肺部一邊花哂

由於疫情關係，方俊一直難以跟進張偉文入院後狀況，只知道張偉文入院當天，天寒地凍落住雨，喺院外嘅隔離區帳篷內等候咗超過10小時，之後送往急症室隔離病房3日，才獲安排去到正式隔離病房，上房後護士曾透露張偉文情況穩定，並且每日注射抗生素治療。直至前天才接獲醫生通知，指張偉文情況轉差。他引述跟醫生嘅電話對話：「醫生話『張偉文情況轉差，對佢嘅病情唔樂觀，由於佢持續發燒，肺部一邊花哂，血液含氧量低，要用4度氧氣機幫助呼吸，𠵱家要用類固醇治療。』」最後醫生仲補充交代話『好多病人突然會轉得更差，若果日後要以呼吸機維持生命，我唔建議令病人受苦...』。」方俊聽完更加無奈，相當崩潰。

張偉文入院當天，天寒地凍落住雨，喺院外嘅隔離區帳篷內等候咗超過10小時。

疫情下不能探望留院嘅張偉文。

張偉文入院當天失聯，方俊親自去急症室了解。

無法跟進病況

張偉文與方俊情如父子，對張偉文病況十分擔心：「噚日我打咗整日，打咗幾十個電話向院方了解張偉文最新狀況，但都係石沉大海得唔到任何回覆，只係叫我留低聯絡，同埋不停追問我同病者關係，我明白呢段時間醫護工作量係好大，但坦白講，佢用問嚟問去嘅時間簡述病情，作為家屬都會安心啲，唔使乾著急，最慘家人無從去了解。最後透過好友姚煒嘅人脈，知道張偉文情況依然唔穩定，除咗仲有發燒，思緒亦出現混亂，幸而血含氧量稍有回升。」由於𠵱家乜都做唔到，除咗姚煒幫張偉文祈禱外，方俊希望各位朋友及Fans集氣祝張偉文能早日康復，大步檻過。他無奈說：「𠵱家確診數字不斷上升，大家真係要小心保重，原先我接咗幾套劇集都因為疫情要延期，加上要照顧家中89歲腦退化母嘅媽媽，壓力真係幾大。」