古天后日誌｜港股反彈乏力 短線瓜多過菜

3月14日，大致天晴，早晚有薄霧，下午氣溫較為和暖。美股上周五三大指數下跌，道指跌229點；標指跟納指分別跌55點及286點。至於港股喺ADR及夜期則跌至20000邊沿，今日將會再度裂口低開，至於能否守住20000，要睇俄烏局勢如何發展，雙方將再舉行視像談判，不過同時歐盟擬敲定對俄第四輪制裁。

除O左俄烏局勢之外，另一個市場焦點將會係本周儲局將舉行議息會議，通脹高企嘅同時，俄烏卻爆發戰爭，全球經濟或因此陷入衰退，令通脹演變為滯脹，聯儲局未能以大幅加息控制通脹，或令通脹隨時失控。除O左外圍利淡因素持續，港股同時受本地疫情所困擾，深圳宣布緊急封城七日，令本港禁城進行全民檢測陰霾揮之不去，最大問題係港府對此一直議而不決，令不明朗因素持續，呢個亦係令到港股易跌難升嘅原因之一。

雖則俄烏雙方已進行數論談判，但暫仍未見任何成果，美國等多個西方國家及組織更先後對俄羅斯展開不同程度的制裁行動，而俄羅斯亦表態會反抗；市場暫對雙方談判唔太樂觀。而上周美國證券交易委員會(SEC)突公布5家面臨強制退市的中概公司名單，市場憂慮更多中概股面臨退市風險，相關股份沽壓嚴重。

港股持續弱勢，恒指已反覆跌至20000點邊沿，整體氣氛對港股極為不利，加上美國聯儲局及環球央行加息大環境下，資金只會繼續從港股流走，令指數反彈顯得更加困難，失守20000大關，向下於19500至19800尋找支持嘅機會極大。至於超賣後技術反彈，似乎面對層層阻力，暫時21000至21000阻力唔細，要重返此關，除非有重大利好消息，否則本周港股都係瓜多過菜。

古天后

(徐狄怡，證監會持牌人)