炎明熹化身怪力少女流住手汗開箱 CD包裝拆足3分鐘

2022-03-14 23:30

炎明熹（Gigi）與其他「聲夢」學員在今年情人節推出的《青春本我》原聲大碟，以親筆撰寫感性的千字文分享感受；今日面世的第2版，她轉為在個人網上頻道以「怪力少女開廂大法」為題分享興奮。不過片長6分半鐘，最初的3分鐘都是用來拆開保護CD的透明膠面，全因她堅持掏手不用任何工具！

片中Gigi最初表示想用手捽開膠面，卻因手汗太多未能如願，自嘲要做怪力少女Gigi上線，並自言所指的怪力並非力氣，而是自己的思維，因有時自己會有一種「無啦啦」的動力和衝勁形成一股力量。由於Gigi已經多次抺手汗，姑丈也看不過眼問：「要唔要鉸剪？」但Gigi拒絕說：「唔使！我要做怪力少女...最衰剪了手指甲，否則可以一嘢K.O.！」。搞笑是在旁的姑丈似乎看得着急、替她緊張；未幾Gigi又謂：「我知道姑丈攞咗把鉸剪，但我唔會用，我要用我的聰明才智去解決一切；但姑丈你啲唞氣聲可以唔好咁大，觀眾應該會聽到！」隨即表示會加上背景音樂來滅姑丈的唞氣聲，Gigi同時要兼顧拆碟及講嘢，還不忘搞笑，令畫面全無冷場。終於3分鐘後，她利用了自己僅有的手指甲成功開啟包裝，又賣口乖說有這片膠面的好處就是防止像她這類手汗多的人弄濕CD封套。

Gigi話最衰剪咗手指甲，否則可以一嘢K.O.！

搞咗3分鐘，終於成功！

面對自己有份的新版CD，她直言心情有點激動，並逐一介紹碟內附有的「聲夢」學員的劇照及劇中的學生證，對每位學員她都大讚，唯獨介紹到自己的照片時，就笑說有一個叫炎明熹的傢伙，又取笑自己用拳頭遮掩半邊面哭泣的樣子，自嘲明顯有好多手毛，叫大家當睇唔到，但隨即又笑指日後粉絲要求她簽名，會簽在自己的手毛上。最後當然是不忘豎起手指公呼籲大家多多支持買碟，並可以跟她一樣徒手拆碟。