Juicy叮｜公司嫌工作效率低要在家開鏡頭 網民呻失自由惹議
2022-03-15 21:10 
疫情反覆下，重過正常生活遙遙無期。有網民於「香港討論區」發文抱怨指，公司要求員工辦公時間在家居開設鏡頭監察工作。
發文者說，已經在家工作一個半月，公司嫌員工在家工作工作效率太低，懷疑員工在辦公時間「hea」住做，所以要求員工在家中要啓用鏡頭監察住工作，如果電腦無鏡頭就要手機安裝程式開鏡頭。發文者抱怨，「咁就失去左WFH嘅自由」。
不過有網民覺得合情合理，「樓主公司有無裝CCTV ? 我想問下在家工作應該有咩自由」、「咩叫WFH嘅自由，即係你公司冇講錯啦」、「打工要自由根本是偽命題」。有人就覺得不合理，「開cam咁痴線？我寧願返office 」。
有人就認為在家工作無可厚非是效率較低，「我有些朋友， WFH， 下午落街嘆下午茶， 因為下午茶餐多數會便宜一些， 跟住同個仔去公園玩一會。當然， 過年後疫症更勁， 這種活動就少了很多， 只是多了打機， 他們說， 工作十分輕鬆。但有些朋友， 說在家裡仍很努力， 但會受到家人滋擾， 不時問食唔食野， 個仔唔聽話， 鬧下個仔.......」、「唔講hea唔hea先，正常喺屋企嘅較率一定低啲架啦！屋企嘅電腦配套點同公司比？又無得print嘢，屋企部電腦又慢啲（我係）。WFH最大好處時間彈性啲，可以訓晏少少，但收工收夜少少（我會補返鐘），lunch又可以揀晏少少食，樓主講嘅係呢種自由囉。」
也有人覺得最重要是交出功課，「其實WFH hea得嘅，份工係咪本來都唔忙，喺office返工都只係扮忙？我哋老細從來唔睇我哋忙唔忙，總之by幾時，你要交啲乜，deadline前交得出就得，話之你hea住做定滴哂汗。你有本事，人哋做一個鐘你做一分鐘嘅，咁你咪hea 59分鐘囉。」
帖文轉載自「香港討論區」
最新回應