姜濤為街頭開飯速遞員發聲下月23歲生日Fans做慈善

2022-03-16 23:30

近日人人留家抗疫，自然多咗網購，速遞員都做到冇停手，飯都要坐喺街邊食。有網民日前在某屋苑的居民聯絡組的FB專頁中，表示見到一名速遞員坐於行人通道旁，以手推車用作飯檯並除下口罩食飯，該網民斥該速遞員影響衛生，又聲稱已向物業管理公司及保安公司投訴。此舉即時被其他網民批評，鬧爆投訴人冇同理心，連林盛斌（Bob）亦於社交網為該速遞員抱不平。疫情下大家都唔易過，有時真係要設身處地諗吓人哋嘅難處！姜濤亦就速遞員被投訴一事出Po：「多一點尊重，多一點包容，多一點理解。」為對方發聲。

姜濤都忍唔住發聲。

一向好心地的姜濤，影響埋一眾「姜糖」（粉絲暱稱）。下月30日就是姜濤23歲生日，「姜糖」去年豪花六位數字於銅鑼灣打造「姜濤灣」，今年就響應偶像的善心，將進行不同的慈善項目，作為給偶像最好的生日禮物。

舊年姜濤生日，Fans大灑金錢包車、包大廈外牆同燈箱慶祝.

「姜濤香港後援會」聯同「姜濤姜糖將心比心義工團」，將與香港兔唇裂顎協會合作，推出限量版套裝金旗認捐。而香港兔唇裂顎協會亦在社交網表示，協會運作經費主要來自每年一度的賣旗籌款：「因新冠肺炎疫情正肆虐本港，使本會難以旅4月23日舉行街上賣旗活動，故請大家踴躍支持本會賣旗日限量版套裝旗籌款」，並特別鳴謝「姜濤香港後援會」及「姜濤姜糖將心比心義工團」設計賣旗活動套裝旗及協助認捐活動，至於姜濤的後援會亦已在社交網開始呼籲「姜糖」支持認購。