獨家丨許俊豪望終有日當男主角演變態連環殺手演技獲讚

2022-03-17 22:30

許俊豪（Lincoln）挾着組合天堂鳥（BOP）發展7年，去年開始專注戲劇演出，早前即憑劇集《愛上我的衰神》變態連環殺手「竇哲人」，入型入格演出，獲網民狂讚，可惜撞正疫情未能靠人氣搵真銀，未來會繼續努力演戲唱歌雙線發展的他，只望有朝一日能當上男主角。

採訪：杜淑霞攝影：沈健程

Lincoln自言單身好Dry，但目前都會以事業為重，「事業都Dry嘅話更加唔好。」

《衰神》中Lincoln的眼鏡Look成為標誌，有Fans要求他戴眼鏡才合照。

Lincoln 早在20歲便加入當時的HKTV訓練班入行，對演戲早有興趣，所以當監製邀請他演出「竇哲人」時，他已知是好機會，「佢話『我有個角色想搵你做，唔知你肯唔肯做』，我聽完個角色，梗係即係話做，因為喺電視劇範疇，大家對我唔係咁認識，同埋做奸角喺演戲嚟講係個好挑戰。」

Lincoln跟《衰神》中一班受害者大合照，個個都傷得唔輕。

Lincoln拍攝虐打谷婭溦戲份，錯手差點摑暈對方，令他非常歉疚。

搵真銀機會成空

為了演好角色，Lincoln特別參考了電影《小丑回魂》中「小丑」放盡式演出，「有啲人話我做到好放，做到好似冇晒形象，我就係想放到自己最盡畀大家睇。」果然出色表現被網民一致讚好，「我記得第7集係最震憾，啲人係翻睇再翻睇，Cap晒圖咁，有啲網民仲曝粗話好變態，我自己睇返都覺得好好笑，好開心見到呢啲狀況。」他最估不到連有份拍《衰神》的影后羅蘭姐，都有留意他演出，「新劇《法言人》我係做佢個孫，見到佢會話『我望住你好驚呀！你真係好入咗個角色，好恐佈呀！』但係佢望住我係喺度笑，好得意。」

Lincoln跟羅蘭姐合作新劇《法言人》，演對方孫仔。

Lincoln本來想跟陳嘉慧拍檔搵真銀，遇上疫情大亂計劃。

有好反應Lincoln當然鼓舞，但他坦承因疫情影響搵真銀機會成空，「觀眾嘅回應已經係第一步得益先，聽到有人稱讚，就算唔知有冇人搵我去做其他角色，都開心有人留意。原本我同女主角Erica（陳嘉慧）係有首合唱歌，Cover咗谷亞微主題曲同插曲，試吓做個新組合一齊出騷，但係撞正疫情，就算睇咗段片覺得幾好，想搵我哋唱歌都唔得啦！唯有做返多啲片去Keep住人氣。」未來目標他向男主角位置努力，「當然唔想埋沒咗唱歌方面，想同步發展，如果戲劇方面目標就梗係想做男主角，呢個係長遠目標，只要Keep住努力拍多啲劇，學習多啲，我相信會有機會可以有套劇做男主角。」