古天后日誌｜第二季憧憬內地降準降息帶動股市向上

4月4日，天晴，天氣乾燥，日間較為和暖。美股上周五反覆向好，道指升139點；標指升15點；納指升40點。呢個星期美股踏入業績期，要睇美企業績能否帶動美股繼續上。美股近日成敗，某程度上依靠中概股表現，上周五中國表示將配合美國審計標準，只要不涉及國家信息安全，配外審計工作會積極配合，喺美方強硬表示唔配合審計標準就只有除牌呢條路之下，中企亦無謂糾纏，中概股鬆一口氣，港股亦受中概股投資氣氛改善帶動，上周五喺ADR及夜期均見有理想表現。

恒指重上22000水平企穩，雖然北水要待周三才回歸，但喺成交薄弱下，港股保持向上之勢。上月中港兩地股市一度顯著下跌，但喺阿爺出手維穩下，上季跌幅顯著收窄，而過去10年恒指亦有90%在4月份錄得升幅，預期今個月港股表現向好機會較大。中國證監會周六再刊發《關於加強境內企業境外發行證券和上市相關保密和檔案管理工作的規定》之修訂草稿，就此諮詢公眾，矚目之處在於「堅定支持企業根據自身意願自主選擇上市地」，刪去原稿「現場檢查應以我國監管機構為主進行，或者依賴我國監管機構的檢查結果」，市場解讀為去年收緊境外上市監管態度有所軟化，並為中美審計底稿爭端示好。

古天后已多次表示，上月恒指一度跌至18200水平，但其後國家隊強勢入場，逼得淡友急急平淡倉，並大舉回補沽空股份，冚倉活動令港股喺短短兩日間回升近三千點，成交亦顯著上升。其後港股升勢放緩，成交亦隨之減少，但港股並未有因為成交縮水而走弱，反而進一步回升至22000水平，預期港股呢兩日將會喺高位整固，只要能企穩22500關口，恒指仍有機會向上挑戰23000水平。

人行召開首季貨幣政策會議，喺貨幣政策基調方面，央行將「加大跨週期調節力度與逆週期調節相結合」，調整為「強化跨週期調節和逆週期調節」，將「穩健的貨幣政策要靈活適度」調整為「加大穩健的貨幣政策實施力度」。人行仲添加咗「靈活適度」、「進一步疏通貨幣政策傳導機制」等表述，將「更加主動有為，加大對實體經濟的支援力度」調整為「主動應對，提振信心，為實體經濟提供更有力支援」。呢啲字眼上嘅調整，令市場憧憬第二季會否進行降息降準。一旦內地放鬆貨幣政策，有助刺激中港兩地股市進一步做好。

古天后

(徐狄怡，證監會持牌人)