獨家丨陳煒親證押後婚期唔做四月新娘稍後出心Po通知親友

2022-04-06 16:30

陳煒今天在社交平台傷痛地透露90歲老父因病離世，由於事出突然，完全冇心理準備，除咗令煒哥悲傷沉痛外，亦打亂她本月中嘅婚事。向來重孝道嘅煒哥向《頭條娛樂》承認會將婚期押後，待情緒平伏一點後，會親自發文交代。

煒哥因為丁父憂，煞停4月中婚事。

陳煒嘅決定得陳醫生支持。

因為爸爸過身嘅事，陳煒心情備受打擊，原先4月中結婚的她一切已準備就緒，但現階段煒哥冇心機去搞結婚，同陳醫生慎重商討下決定將婚期押後，陳醫生也表示明白及支持，據知，煒哥先將婚事放埋一邊，暫時未有延期時間表。

由於疫情下本身婚事從簡，當日只係喺律師及證婚人何國鉦見證下，喺屋企簽張婚書，所以就算突然煞停婚事都唔太麻煩，唯獨煒哥周前已個別send咗google form畀親友，交由佢哋填寫資料，等大家填好，就會一次過寄出囍餅及婚嫁小禮物，所以待情緒稍為平伏，日內會親自出Po向親友交代返件事。目前煒哥只想有空間靜吓，不過她未有向劇組請假，仍然開工拍TVB新劇《回歸》，相當專業。