柳應廷四出睇樓望做業主認財力有問題：唔好恭喜住

2022-04-23 19:30

柳應廷（Jer）與林家謙及Serrini等到九龍灣為明晚（24日）舉行的《Chill Club頒獎禮》作綵排，Jer近日被影到現身示範單位睇樓準備做業主，受訪時記者恭喜他，Jer笑言：「唔好恭喜住，我都係睇吓樓啫，都只係一個小小香港人想買到樓，但未做到業主，純粹睇吓示範單位。」Jer承認正四出睇樓，問到目標可以在今年達成？他稱也想達成，問財力是否夠上車？他笑言：「財力方面仲好有問題，但都想父母可住得好些。（計劃自住？）可能自住可能投資，未知計劃係點，希望買到啦！（Dream House係點？）希望買獨立屋，和屋企人住可以有多些私隱。」

Jer（右一）今日為《Chill Club頒獎禮》綵排。

Jer日前現身睇示範單位。

Jer直認想做業主。

另外，Jer正與盧瀚霆（Anson Lo）拍攝ViuTV新劇《百萬同居計劃》，但可惜原定參演的呂爵安（Edan）因撞期無奈辭演，定「JERDANSON」未能合體演出，Jer坦言對Edan退出的安排有點失望：「失望一定有，因為《男排女將》之後好耐沒有合作，但無計，他好忙好多工作在身，但相信好快有機會再合作。（有指Edan因陳漢娜加入而退出？）絕對不會，Edan都澄清了，唔係事實我都不評論。（沒有「田牧CP」不用做第三者？）雖然是《大叔的愛》班底，但故事是新題材不是延續，但我不可以劇透呀，暫時沒見到男男咀戲，但我角色造型好突出，性格會怪怪哋。」

MIRROR三子無緣齊人開新劇。

Jer正與Anson Lo拍攝ViuTV新劇《百萬同居計劃》。

而MIRROR傳言將踏上紅館舉行13場演唱會，將於周二公佈細節，Jer表示未知詳情，要等公司公佈：「當然想踏上紅館，是每一位歌手的夢想。（如開13場應令到？）應該要操體能，但忙拍攝未有時間操體能。（想開紅館個唱？）好想！都有幻想過，但要儲多些歌，我有時想到Rundown都會寫低，希望將來有機會拎出來用。（想做業主先定開個唱先？）Why not both！」