古天后日誌｜下周聯儲局議息為後市重要參考數據

4月26日，大致天晴，早上沿岸有薄霧，日間炎熱。美股隔晚低位反彈，3大指數均自低位反彈，以接近全日高位收市。道指早段一度跌488點，至中段止跌回升，報收34049點，升238點；標指跟納指分別升24點及165點。暫時道指叫守咗頸線位33800點，並重上34000點心理關心，叫做短線擺脫咗再大幅下跌危機。

留意美國聯儲局下周議息，議息前美股三大指數一度回試3月低位反彈，10年債息則再一次升抵3%後回落，即管等埋下周美聯儲議息，10年債息會否突破3%重要關口，一旦10年債息升穿此關口，美股可能再急轉直下。美股亦已踏入業績期，雖然唔少企業都交出一份見得人嘅成績表，但對今明兩年業績展望則趨向保守，主要係通脹威脅及息口高企下，企業成本壓力上升，企業毛利受壓。美股目前仍處於步步為營嘅境況，下周議息及聯儲局對息口路徑嘅提示，將會係美股後市重要指標。

至於中港兩地股市噚日再度顯著下跌，恒指更失守20000點心理關口，恒指喺完全回補3月中嘅上升裂口後，並未有止跌回升反彈，反而跌勢加劇，盤中低見19784點。不過喺美股隔晚止跌回升下，預期今日港股有所反彈，20000心理關口能否企穩仍有待觀察。由於人民幣持續走弱，港匯亦一直貼近弱方兌換保證，令資金加快從兩地流走，兩地股市喺缺水情況下，當然無運行。

股債及貨幣基金齊走資

睇返資金流向監測機構EPFR及Refinitiv Lipper搜集嘅資料顯示，全球股票市場資金不約而同加快外流。EPFR數字反映，新興市場按周計，資金外流規模大增3倍有多，達到16億美元，亞太股市亦扭轉正流入情況。若論走資規模，美股高達180億美元。呢啲數字反映，股、債以至貨幣基金全部走資；美股及環球股票基金資金外流規模創超過4個月以來最多，債券及貨幣基金贖回規模則創5星期及9星期以來最大，只有商品及通脹掛鈎債券再錄資金流入。

資金流向反映資金愈發傾向避險，尤其係當聯儲局陸續有官員放鷹，令市場揣測加息速度跟幅度均會加快，債息上升速度亦隨之加快，以2年期國債息率計，一星期升幅達到8%，短短4個多月累積升咗接近2厘。更甚嘅係紐約聯儲銀行前行長達德利說過，要控制通脹預期，股市必須要跌，呢個亦係近日美股明顯走弱嘅原因。如果美股嘅走資只係剛剛開始，目前去估底似乎言之尚早，短期留意住下周議息結果之餘，聯儲局對未來息口路徑嘅取向，應該係後市嘅關鍵。

古天后

(徐狄怡，證監會持牌人)