姜濤遭三痴漢強吻慶生魯庭暉讚有「大器」初出道已好識諗

2022-05-01 12:00

MIRROR人氣王姜濤昨日（4月30日）23歲生日，姜糖為與民同樂，舉辦免費電車日慶祝「姜濤誕」。昨晚十時許，姜濤突襲銅鑼灣答謝姜糖，搞到「姜濤灣」一度淪陷，人逼人、尖叫聲震耳欲聾，最後姜濤僅逗留約3分鐘，便拔足跑離現場。

仍是單身的姜濤，寄情工作，正日生日仍忙於為新劇《季前賽》開工，好兄弟Edan（呂爵安）昨晚在社交網上載慶生短片，與大表哥Stanley（邱士縉）、肥仔（梁業）一齊吻賀壽星仔。片中見姜濤一開始笑臉迎人，但三子突然一齊衝前錫他的面珠，姜濤表現得好抗拒9秒9彈開，但最後三子都輪流錫一啖，姜濤苦笑說：「黐線㗎！」得呈的Edan笑得最奸，並留言：「姜哥大壽🎂為你送上三位痴漢💋記得2100有史詩級MV睇！🔥🔥」，大表哥就話姜濤已成為世上最幸運的男人。

一開始大家都係正正經經咁影相。

三子突擊姜濤錫面珠。

姜濤彈開都冇用，大家輪流再錫，姜糖們應該好羨慕。

Edan笑得好奸呀！

姜濤為《季前賽》開工，大家送咗個籃球蛋糕同佢慶祝。

完成工作，姜濤就快閃銅鑼灣答謝姜糖。

19歲姜濤最想演復仇角色

姜濤的第十胎新歌《作品的說話》昨日推出，MV上架半日已有近50萬觀看人次。剛升任做MakerVille行政總裁的魯庭暉亦有幫手宣傳，在社交網上載新歌宣傳照，回想姜濤4年前初出道已有「大器」風範：「早幾日，收到佢哋個未Final Version。我諗番起幾年前，頭幾次同姜濤傾偈嘅時候，我問佢，喂如果呢依家畀個男一你做，你會想做個咩角色呀。咁我通常得到嘅答案會係『邊套戲嗰個邊個』或者『邊位演員嗰隻』。姜濤當時嘅答案係『我想做啲要復仇嘅角色』。我問，點解呢？佢話『魯生你話依家吖嘛，咁我依家咩都唔識，實做得唔好，我睇戲呢，好多時啲復仇角色呢，淨係呆咗咁望住一樣嘢，跟住導演、攝影師，編劇啦嗰啲就會令觀眾感覺到個氣氛。我都未得，唯有靠其他專業崗位。嘩，19歲。當時，我唔知佢會唔會紅，我只係知，這叫大器。23歲，自己導埋個MV。依家，佢望住一樣嘢嘅時候，經已唔係『淨係呆咗咁』，這叫進步。」不少姜糖都留言多謝魯生的分享，並大讚偶像是一位謙虛又專業的藝人。