古天后日誌｜美股靜待議息 後市仍傾向悲觀

5月4日，天晴乾燥，日間天氣較炎熱，不過都幾好風。隔晚美股收市上升，道指指67點；標指升20點；納指則升27點；觀望氣氛濃厚，等待聯儲局議息結果。雖然美銀研究發現散戶嘅熊市情緒指數高漲，目前達到59.4%，已創2009年3月金融海嘯後，美股見底時新高，而俗稱「恐慌指數」的芝加哥期權波動率指數(VIX)本月持續企穩30點以上偏高水平。雖然悲觀情緒令部份投資者期望標指見底反彈，但美銀警告喺各項市場指標趨弱下，美股仍未見底，標指今年或低見3800至4000點，任何反彈均可能遇到沽壓。大摩亦認同美股仍要調整，標指最悲觀可能下試3460點，即較現價仍有17%跌空間，並呼籲趁反彈沽貨。

至於今晚聯儲局將有議息結果，而加息0.5厘早已喺意料之內，而6月及7月嘅議息會議，有可能加息增至0.75厘，呢啲都已經係price in咗，大家要等嘅唔係議息結果，而係聯儲局對通脹、經濟去向睇法，從而量度一下聯儲局喺今年餘下時間嘅息口路徑。

美國通脹持續高企，目前處於40年高位，聯儲局加息當然無懸念，市場更為關注縮表會否加快。而通樣面對通脹嘅澳洲，噚日亦決定加息，亦表明未計劃將到期的政府債券收益進行再投資，意即逐步閂水喉。全球央行正展開大規模嘅量化緊縮潮，意味住市場流動性趨緊。加上地緣政治角力不斷升級，各地嘅經貿與貨幣競爭只會更加激烈，全球經濟復甦之路只會變得更崎嶇不平。

歐央行料短期內加息縮表

本來市場預期澳洲央行最快喺6月先開始加息，避過對5月21日嘅大選構成影響，噚日忍唔住提早加息，主要係其首季通脹按年增加5.1%，為2001年次季以嚟最大升幅。就連加息步伐一向慢半拍嘅澳洲都按捺不住提早行動，估計歐洲央行加息縮表亦會於短期內進行，而英國本周議息，或進行第四次加息行動。

至於全球第二大經濟體系中國，一直堅持「清零」嘅防疫政策，令投資跟消費信心大打折扣，當局須花更大氣力維持人民幣匯率穩定。但喺其他央行以加息控通脹之際，中國卻反其道而行，需要放水以穩經濟，難免令人民幣壓力大增，呢一點正正係影響人民幣走勢持續弱勢嘅原因。而缺乏外資參與，中港兩地股市表現疲弱，試問一個欠缺成交配合下嘅反彈市，又可以維持幾耐......。

古天后

(徐狄怡，證監會持牌人)