古天后日誌｜中港兩地股市現水平有支持

5月12日，多雲有雨，有驟雨及狂風雷暴，雨勢有時頗大。美國隔晚公布上月通脹數據，4月CPI按年升8.3%高於預期，撇除能源及食品的核心CPI按年升幅為6.2%，亦高於預期。美國通脹仍處於40年高位，進一步強化聯儲局嘅緊縮貨幣政策，美股隔晚反覆向下。道指早段一度升逾400點，但中段開始掉頭向下，收市跌326點；標指跟納指分別跌65點及373點。科技股繼續受壓，重磅嘅科技股全線下跌，高估值嘅二三線科技股更被血洗。

美國通脹居高不下，預期嚟緊5月及6月嘅議息會議，加息0.5厘在所難免，其實聯儲局亦有預期息率喺今年之內要加到去2.5%或以上，反而快快手手加息去控制通脹，總好過通脹一直唔受控。其實息率可加可減，若然到第三季通脹見頂回落，過完暑假返嚟，9月及11月議息減返轉頭亦唔出奇，呢個亦係古天后點解睇美股去到第三季後有機會做返好啲嘅原因。

目前只可分段吸納龍頭股

雖然美股跌到一仆一碌，但港股由21000水平回落至日前19200水平左右已刹車，似乎大戶未有意欲進一步踩低港股。而由於港股早已較美股先行一步，目前唔少股份嘅估值已變得合理，甚至已跌至吸引水平，喺19000水平已見支持。雖然港股仍然喺低位徘徊，處於多條平均線之上，走勢上仍未轉穩，不過作為中長線投資，現價收集已有一定值博空間。尤其美股暫時仍有下調空間，或吸引部分資金回流亞洲區市場，港股料可於19000水平有較大支持。

當內地疫情逐步受控，而內地一直堅持穩經濟政策，A股料可靠穩，目前無論是A股或港股都好，只係缺乏更多資金流入，或者兩地股市仍需要喺現水平整固，待成交配合先有更大動力向上。但礙於美股仍處於劣勢，目前都只可以分段吸納龍頭股，未宜太過進取。

古天后

(徐狄怡，證監會持牌人)