張敬軒破紀錄四度安歌嘉賓Serrini後台High爆高唱：泰國捐精

2022-05-15 20:00

張敬軒紅館騷來到第五晚，每晚都二度、三度安歌，昨晚（14日）更破紀錄四度返上舞台！疫情中開騷的軒仔自言這段期間學會要好好活着，把握在世上的時間、做自己喜歡的音樂：「我要將上帝俾我嘅使命好好去履行，我喺樂壇唔係純粹要呃like，喺IG扮鬼扮馬𠱁大家開心。我應該利用自己手頭上得到嘅再分享俾人，呢個先係我價值！」他坦言做新人時曾被叫「嘉賓王」，因做過好多前輩演唱會嘉賓，才被更多人認識，所以都希望給予新人機會：「今晚嘉賓都係一位新人，我哋冇乜交集，但識咗好長時間，呢個咁有才華嘅女人，咁叻、咁有趣，令我流晒口水，希望將來音樂上有合作！」此人便是Serrini。

張敬軒做新人時曾被叫「嘉賓王」，現在亦希望多給機會新人。

軒仔自言喺疫情期間學會要好好活着，把握在世上嘅時間、做自己喜歡嘅音樂。

軒仔搞笑點評Serrini「戰衣」：「咁似聖誕樹？波波裙……我以為係小鳳姐。」而Serrini則帶了禮物送給軒仔，「我見人人都有禮物，不過我唔會送果醬嗰啲……呢個係一個鑽石砌割嘅心形葉。」軒仔接過盆栽笑言：「我知呀，呢種叫多肉植物嘛！」Serrini答：「咪係我囉。多肉樹樹……你唔使淋咁多水，dry dry地就得。」軒仔即抵死接口：「dry dry地，咪似我？」

Serrini送盆栽做禮物。

Serrini 話見軒仔就好緊張，但返到後台就high爆跟住唱「泰國捐精」。

Serrini演唱完後，於後台聽到軒仔的《櫻花樹下》音樂響起，抵死地說：「我又要『泰國捐精』！」然後當軒仔唱到「太過堅貞」一句時，她便自拍高唱「泰國捐精」，十分興奮。問她在台上似乎好緊張，Serrini坦言：「真係唔知點解見到軒仔就緊張到不得了，想講嘅說話都唔記得咗。」還透露和軒仔是由網友變朋友：「佢好早follow我，跟住咪網友囉。佢對朋友好好，而且佢聽得明我啲無聊笑話。所以我哋好多嘢傾。我嘅第一次……紅館做嘉賓就俾咗佢，哈哈！」

當晚英皇集團主席楊受成、太太陸小曼、英皇集團副主席楊政龍、英皇娛樂集團行政總裁許佩斯及旗下一班藝人均有到場撐軒仔。