古天后日誌｜美股拖累港股再度考驗二萬關

5月19日，大致多雲，早段有一兩陣驟雨，日間部份時間有陽光。美股隔晚三大指數暴跌，道指跌1164點，為2020年6月11日以嚟大單日跌幅，亦係2021年3月以嚟新低；標指跟納指分別跌165點及566點，跌幅超過4%。鮑爺承認就控制通脹方面，係遲咗郁手加息，雖然講緊未來兩次議息會議傾向加息0.5厘，但就強調為咗對抗通脹，會果斷加息，呢個言論偏鷹，市場當然有啲戒心。

再加上Target業績後跌到一仆一碌，亦充份反映成本上升令企業盈利出現壓力，股價急挫逾兩成。與此同時，Tesla被踢出ESG指數，進一步影響市場氣氛，三大指數走弱，美股反彈話咁快玩完，納指又再下試通道底部。雖然美國零售數據尚算唔錯，但零售企業公布嘅業績已反映成本上升打壓企業盈利，再加上擔心加價影響銷售，企業無法將成本透過加價轉嫁予消費者，毛利當然受壓，而管理層對全年預測亦難樂觀。美股喺缺乏企業盈利支持下，美股自然易跌難升，下個月美國聯儲局開始正式縮表，未知對市場流動性會帶嚟幾大影響，暫時美股表現仍反覆，即使急跌有意撈貨博反彈，亦只能步步為營。

港股縱反彈 惟動力欠奉

至於港股，雖然阿爺好努力咁出口術唱好科網股，但美股嗰邊跌到啪啪聲，港股又豈能獨善其身，古天后都講過呢個月港股只會反覆上落，反彈仍要面對重重阻力，阿爺再三出口術，港股亦只能寸進。上周恒指跌至19200水平反彈至20600點又見阻力回落，美股插水窒礙港股繼續前進，今日預計恒指10日及20日線得而復失，觀乎牛證重貨區上移至19800水平，會否借外圍頽勢跌至該水平殺牛，機會都唔細。加上港股即使反彈，成交一直未見增加配合，上升動力欠奉。

講返噚日派季度成績表嘅騰訊(00700)，表現強差人意，今日開市下殺已成定局，而睇返QQ呢兩次嘅業績，過往高速增長嘅日子一去不復返，經過一整年嘅監管打壓，再加上疫情影響廣告收入，QQ今年首季收入按年增長僅0.12%，增長幾近清零，亦差過預期。噚日已見北水淨流出手QQ近6億港元，春江鴨果然勝券在握。即使國務院總理李克強周三重申「要支持平台經濟」，騰訊總裁劉熾平表示，中央有關積極論調轉化為實際行動仍需一段時間，目前尚待行業完成整改，因此對集團業務利好作用或有滯後。換句話講，騰訊喺未來一段時間，都只會有波幅，難有升幅，只會區間上落，難有驚喜。

古天后

(徐狄怡，證監會持牌人)