古天后日誌｜港股隨美股反彈 惟上升動力一般

5月30日，大致天晴，但局部地區有驟雨，早段更有一兩陣雷雨，天氣炎熱。美股上周五做好，三大指數上升，道指升575點；標指跟納指升幅更大，分別升100點及390點。高盛表示，數據顯示美國通脹從40年來高位回落迹象，可能對股市有利。美國4月份PCE同比增長6.3%，低於3月嘅6.6%增幅，有理由相信美國通脹喺3月見頂並進入放緩期。隨著通脹威脅減退，美債息從高位回落，美股即借勢反彈。今晚美股假期，不過本周有唔少經濟數據及就業數據公布，即管睇下美股反彈勢頭能否延續。

過去一個月，阿爺多次出招撐市，最新消息係國務院常務會議落實進一步穩經濟措施，努力推動經濟回歸正常軌道。會議決定實施6方面33項一攬子措施，包括喺更多行業實施存量和增量全額留抵退稅，增加退稅1400億元(人民幣，下同)，全年減退稅2.64萬億元。將中小微企業、個體工商戶和5個特困行業緩繳養老等社保費政策，延至年底並擴圍至其他特困行業，預計今年緩繳3200億元。

再三強調「三保」

金融政策方面，今年普惠小微貸款支持工具額度和支持比例增加1倍，對中小微企業個體工商戶貸款、貨車車貸等，支持銀行年內延期還本付息，並叮囑銀行放款增長要超過去年同期，擺明要銀行幫手撐企業。國務院日前召開「全國穩住經濟大盤」電視電話會議，省市縣區負責人均受邀參會，估計有超過10萬人參與。會議要求國常會宣布穩經濟一攬子政策，要喺5月底前推出實施細則。再三強調「三保」，即保市場主體、保就業、保民生。

不過暫時未見A股有太大反應，講到尾又係資金問題，據銀保監數據顯示，第一季度險資繼續增持債券，佔比增至39.24%，意味著投入A股比重正在減少，呢個亦係喺阿爺眾多政策支持下，中港兩地股市上升力度欠捧嘅原因。

至於港股今日期指結算日，借美股反彈之勢，今日恒指料乘勢高開，並嘗試向上挑戰21000點結算。不過港股從5月10日低位約19200水平反彈，累計至上周五已反彈逾千點，相信即使今日成功挑戰50日線(20852)，21000至21200點阻力頗大，要成功突破並企穩，仍有賴於成交配合，可惜至目前為止，港股成交未見隨住反彈以增加，予人乾挾淡倉感覺強烈，現水平先入場再博向上嘅值博率已大減，手上有貨仍可以再坐一會，望指數挑戰阻力位，但無貨高追就無謂，畢竟本周五假期，呢個星期只有四個交易日。

古天后

(徐狄怡，證監會持牌人)