古天后日誌｜港股唔上唔落 21000值博率有限

6月6日，日間短暫時間有陽光，天氣炎熱，有幾陣驟雨及雷暴。美股上周表現反覆，上周五因為非農數據強勁，三大指數下跌，道指跌348點；標指跌68點；納指跌304點，跌幅達2.4%。市場從經濟數據表現，揣測美國可能再加兩次息後停止加息，美股在上周一度炒上，不過通脹實際上仍然高企，但同時從多間零售企業嘅業績反映，零售市道慘淡。就連銷售表現出色嘅Tesla，舵手Elon Musk都話有意裁員，預示未來需求可能下降。凡此種種，都反映美國陷入滯脹機會增加，如此一來，美國聯儲局就要面對兩難，既要加息控制通脹，但又怕加息窒礙經濟發展。
 
美股反覆令港股投資者亦無所適從，雖然內地不停推出穩定經濟措施，正常當然利好中港兩地股市，無奈美股表現反覆，美股一旦出現震盪，全球股市亦會被拖累，中港股市當然難以獨善其臼身。而港股亦維持上落格局，尤其反彈至21000水平之上，值博率已大大降低，現水平追貨實難以取得可觀回報，市況開始進入好淡爭持局面。
 
欠資金入場 塘水滾塘魚

上周五美團(03690)收市後公布業績，表現好過市場預期，今日股價高開係意料中事。不過美團早於業績前已偷步炒上，股價由140元水平升至180元水平之上，已反映業績，唔排除股價高開低走。美團近日已淪為大戶舞高弄低指數嘅主要工具之一，一旦大戶有意壓低指數，美團業績再好，短期股價再向上空間亦有限。
 
睇返目前港股喺現水平，唔單止值博率有限，就連個股嘅投資機會亦唔多，有一政策支持嘅新能源股及汽車股，過去兩星期已累積唔少升幅，喺現水平追入已無乜着數，其他板塊又唔見資金流入，表現呆滯。講到尾，都係市場仍欠資金入場，嚟嚟去去都係嗰一注資金，塘水滾塘魚，呢啲市況唔上唔落，消磨參與者意志。

古天后

(徐狄怡，證監會持牌人)