喂喂喂丨俊仔踩板曾被標籤「不良少年」努力追夢終成精英運動員

2022-06-21 09:00

J2由昨日起一口氣推出15個全新節目，創意總監鄭詩君（C君）更親手寫了開台歌《I Just Wanna 借啲意》及收台歌《聽晚見唔見到你》，未睇歌詞單睇歌名，已經感受到那份渴望同希冀，甚有拍拖feel。當中《喂喂喂你話你係邊個邊個》就訪問不同領域的素人，尋找他們勵志熱血的追夢故事。

首集的受訪者，是曾代表香港隊贏過全國賽頭三名的陸俊彥（俊仔）。在香港踩滑板可以成為職業，相信很多人會覺得匪夷所思；現年34歲的俊仔少時同好多屋邨仔一樣，無所事事。中學跟同學仔去沙田街頭學踩滑板，人生變得不一樣，他說︰「滑板成就咗坐喺呢度嘅俊仔，着衫、講嘢、做嘅嘢都係因為滑板，至變到而家嘅俊仔。冇滑板？我唔敢想像而家係點樣，廢柴……應該。」

一般人都覺得踩板沒出色，拍攝當日俊仔示範踩板，已多次引來管理員干涉，俊仔話︰「啲人對住架單車行過嚟冇咁驚，踩住板佢就驚。永遠覺得你。會撞到佢，標籤踩板係『不良少年』，以前啲人覺得夜晚唔返屋企就係壞。」

俊仔話到外國交流見多識廣，增進滑板技術。

當年在沙田大會堂的空地，晚上閒閒地都有幾十人玩板。

一個成功動作的背後，是無數的失敗累積而成。

有成績支持令俊仔獲不少贊助，成為職業滑板手。

10歲Woody傳承板術望衝奧

俊仔沒有被睇死，踩足20年贏過不少獎項，更獲香港體院邀請做精英運動員；但要保持資格，就要靠不斷攞獎贏獎金，不達標便要出局。近年他開始教小朋友，傳承滑板技術︰「呢幾年因為奧運關係，奧運冠軍都係十零歲，變相好多人覺得形像好健康，好正面，好多小朋友玩得好開心，的而且確好多好細個小朋友加入踩滑板。」10歲的Woody跟俊仔學了8個月滑板，只用了1、2個月時間，就做到Kickflip（腳尖翻板）動作。俊仔問到Woody的目標，Woody想都不想就話︰「想好似你咁囉，香港第一。」

Woody父母差不多每趟都會到場，Woody媽媽話起先囝囝玩板跌倒，都會好緊張跑過去問「喂！你有冇事呀？」，而家已經滑了牙︰「你唔斷手斷腳，咁你繼續吖。香港小朋友太嬌氣，跌下冇壞，磨鍊係對小朋友最好嘅教育。」

《喂喂喂》監製鄧英奇話滑板成為奧運項目之後，贊成的人忽然多了，想帶出「唔通呢個地方，係要人攞咗獎先會有人認同?」