劉沛蘅近日頻頻接job搵真銀唔會幫男友洪卓立儲老婆本

2022-06-22 14:30

「膠戰女神」劉沛蘅（Hillary）今日到尖沙咀出席運動手錶活動，以一身運動裝扮示人，問到是否有運動習慣？她笑稱疫情前比較多，偶爾會行山及跑步，但疫情則選擇在家中跳繩及做gym，但現在也是時候重拾運動，因有感身型未夠結實，問是否有幸福肥？Hillary甜笑稱：「因為每日都家常便飯，覺得自己有小肚腩，因為自己鍾意食甜品。」

係呀，今日Hillary又出席活動。

以運動裝示人，展示健康性感。

Hillary咁嘅身形都被人話肥……

會否和男友洪卓立一齊運動？Hillary笑指大家方向不同，她需要減肥練線條，男友則是要增磅增肌，她笑說：「雖然佢鍾意我肥，但係工作需要，所以是我谷佢食嘢增肌肉。」有工作指明需要減肥？Hillary笑謂所有工作都需要瘦和靚，因為被同事指肥了不少，因此要減肥。有否向和男友呻慘？Hillary笑謂：「咪日日都呻冇得食，我都有目標，希望兩個月內減到10磅！」講到工作不斷，Hillary直認工作是增加不少，是好好努力的機會，會否幫男友儲老婆本？她笑稱這種事要分開，因為這是男方表現誠意的機會。