獨家丨劉宋威是非纏身:冇良心嘅事唔會做人工激增至七萬

2022-06-23 07:00

豬肉切割員劉宋威(阿威)被指似MIRROR的AK(江𤒹生)被追捧，更跳出街市狂拍廣告。《頭條日報》收到可靠消息，威威家陣收入倍增，除咗3萬蚊店長月薪外，每月額外有4萬蚊花紅，加埋廣告收入，月入近6位數。不過，人紅是非多，有傳後生時行「古惑」嘅威威壓力大到爆燈，要做運動減壓，問到會否擔心再被挖「舊史」？他說：「唔好諗，做好𠵱家嘅嘢，唔開心只會影響表現。」採訪：方騫平攝影：沈健程

當日威威衝出荃灣去美孚做運動，沿途有唔少「威威豬」(Fans)為他打氣，鼓勵佢加油。威威走入商場只係短短十分鐘，即被老中青甚至南亞裔學生妹求合照，更對威威說：「好靚仔，梗係認得佢啦。」其中一位師奶開心說：「我專登去荃灣(肉店)兜咗個圈，但見唔到佢呀！竟然喺呢度見到…」另一位Fans就好奇問：「係咪喺呢度開檔？」最後連大叔都加入「威威集郵行動」。得到「威威豬」打氣，威威心情好返好多，向來熱愛運動的他，玩攀石時，只需三扒兩撥就爬到上頂。

南亞裔學生都係「威威豬」，威粉真係周圍都係呀。

威威好親民，同「威威豬」玩自拍。

得到「威威豬」力撐，威威合十致謝。

每月多咗幾千蚊

有傳威威家陣月入7萬，他發出鬼馬笑聲否認：「你(記者)收錯風喇！冇咁多，只係多咗『幾千蚊』，啲錢留返嚟畀小朋友返小學用，𠵱家收入夠自己及家人用。」居於屯門屋邨的他表示未有錢買樓，然後又再笑住爆少少：「其實嗰幾萬蚊，係銀行數字嚟，每月得呢個數字喺銀行。」威威話自己好慳家，早上食個麵包，午餐帶飯，冇時間食就留做晚餐，有時食$20蒸飯，每日最多用60蚊，用多咗冷氣錢就要扣減其他開支，仲許下承諾同老婆會共患難及共富貴：「冇良心嘅事我唔會做，有家人嘅支持，我先有勇氣行到呢步。」

威威近月接咗保險、波鞋、醬料、保鮮紙及煮食等廣告，成為廣告商新貴。

威威平日帶飯盒返工好慳家。

威威紅到去日本，獲當地媒體報道。

月初逾百個「威威豬」跟他賀壽，威威感動落淚。

唔戴罩都見得人

對於被踼爆當年做過傳銷，威威抱正面態度回應，表示當時只係想搵多個錢養家。至於被指舊照唔討好，他回應說：「我唔會刻意諗人哋點睇我，我就係我，只係做返自己，我又冇呃過人，冇整過容，其實住所及荃灣區街坊，冇乜邊個冇見過我除口罩個樣，疫情緩和幾時都可以除，我個樣唔係唔見得人，唔係只賣對眼。」至於有網友指他係黑社會，他開直播喊住否認：「我係基層出身，但點解屋邨長大就係黑社會？有紋身唔係好人？就畀人歧視…」希望大家不要再標籤佢。