粵劇音樂家高潤鴻從藝40周年　米雪出任紀錄片首播主禮嘉賓

2022-06-27 23:00

著名粵劇音樂家高潤鴻入行40周年，今日（27日）舉行《高潤鴻從藝40周年紀錄片首播暨開幕禮》，除了太太謝曉瑩撐場外，更邀請了米雪及阮兆輝出任主禮嘉賓，更有多位名伶出席支持，而汪明荃、羅家英及霍啟剛亦有拍片道賀。

出身粵劇世家的高潤鴻，入行已不經不覺40年。

高潤鴻和謝曉瑩的母親，都有到場支持。

謝曉瑩開心表示，今年是丈夫高潤鴻入行40周年，亦是她入行10周年，加上是二人錫婚紀念，早前更獲得兩個國家藝術基金項目，故有多重意義，份外值得慶祝，於是決定拍下紀綠片以作紀念，「今日播嘅係紀錄片精華版，稍後會放網上頻道播出。我哋亦會喺7月27日在西九戲曲中心舉行一場演唱會，我個劇團喺26、27兩日會有粵劇《重生趙飛燕》演出，27日又有個大型文聯騷，所以我喺27號要走3場。」問到二人將如何慶祝結婚紀念？謝曉瑩直言都是在工作中度過，高潤鴻則坦言暫未有計劃，「以往會去旅行或者去內地，因為太太鍾意園林同水鄉，但𠵱家通唔到關，可能要去寶蓮寺。（送咩禮物畀太太？）我仲搵緊，過去10年佢都收到好多禮物，我唔想重複。」

今年亦是高潤鴻和謝曉瑩錫婚紀念。

身為主禮嘉賓的米雪，自言跟謝曉瑩特別有緣，最近才合作電影《一樣的天空》，「戲中我做花旦，佢係我徒弟，但佢戲外她反而有教我粵劇造手功架，我覺得佢年輕，有上進心同創意，對推動粵劇文化不遺餘力。」米雪直言對粵劇也有情意結，曾於2013年應李居明之邀演出粵劇《花海紅樓》及《相如追夢》，問到她會否再演粵劇？她說：「我都唔知，因為要花好多時間。」